Ta un hilaridad cu AVP a sugeri durante tratamento di presupuesto 2025 cu ta algo historico cu Gabinete Croes-Eman a atende e reunion pa trata presupuesto di pais Aruba direct despues di nan huramentacion. Manera cu ta algo grandi y “sobre humano”. P’ami sigur esaki no ta e caso.
Di dia 29 di augustus 2024 e presupuesto a keda entrega. Di dia 5 di februari nos a haya e Nota naar aanleiding van het verslag cual a haci e presupuesto cla pa trata, pero Presidente di Parlamento a dicidi pa yama e reunion pa atende cu Presupuesto di Pais Aruba te dia 7 di maart 2025. Pa nos sorpresa e reunion ta start habri cu un show politico orkestra pa Futuro y AVP, presentando un amienda y caminda e Presidente di Parlamento na un manera anti democratico ta dicidi pa manda e amienda pa conseho na instancianan concerni y djei ta schors e reunion sin tene cuenta cu parlamentarionan di oposicion. Asina un biaha mas ta alarga e proceso pa por yega na aprobacion di e Presupuesto di Gabinete Wever-Croes pa pais Aruba pa aña 2025.
Dia 17 di maart conseho di Caft a drenta na Parlamento y di RvA a drenta di dia 21 di maart. Dus di dialuna 24 di maart nos por a continua cu tratamento di presupuesto pero un biaha mas agenda di partido ta bay riba bienestar general y negosacionnan pa forma un gobierno ta mas importante.
Pa mi ta hopi duidelijk cu e situacion cu nos a haya nos aden pa loke ta trata presupuesto di Pais Aruba ta refleha e realidad cu despues di eleccion di dia 6 di december 2024 nos tur a experiencia. Esta a tuma tempo pa celebra Pasco y Aña nobo, djei a start cu negosacionnan, esakinan desde un principio no a cana smooth, djei hopi laat nan a inicia cu screening, cual tambe a tumanan hopi tempo pa keda cla y un eternidad pa nan a yega na nan plan di gobernacion y por a firma esaki. Durante reunion mi a indica cu ta nan propio decision di no laga Gabinete Wever-Croes mes defende nan presupuesto y djei huramenta. Ta nan decision y escogencianan ta loke a conduci cu a keda nos solamente dia 28 y 31 di maart pa trata e presupuesto pa aña 2025, mirando cu Gerlien no por perde cara y mester cumpli cu e fecha 31 di maart cu a keda “stipula” pa CAft y Rijksministerraad.
Nan decision sigur e debilita nan propio fraccionnan cu casi no a haci pregunta y solamente por a felicita nan e ministernan cu nan nombracion, deseanan exito y elogianan cu ya e mesun dia nan mester a bin defende e presupuesto di Gobierno di MEP-Raiz pa aña 2025. Mi persona sigur a keda hopi decepciona mirando cu hopi di e parlamentarionan nobo a indica cu nan meta ta pa eleva e debatenan den parlamento. Mirando cu presupuesto di Pais Aruba ta e ley mas importante cu nos ta trata como Parlamentario mi a spera hopi mas mirando cu ami nunca mas lo lubida nos prome reunion di presupuesto caminda a keda bisa cu nos tabata pio cu oposicion. Mi ta spera cu nan lo sa di ta critico y pone bienestar di nos pais na prome lugar.