“Mester crea e balans necesario pa Aruba por tin un desaroyo sostenibel”
Parlamentario Shailiny Tromp-Lee a duna di conoce dialuna durante conferencia di prensa di Fraccion di MEP, cu durante henter weekend e tabata hayando e pregunta kico e ta pensa di e slogan ‘No More Hotels’.
El a declara cu for di 2017 e ta subrayando riba esaki ora el a drenta den Parlamento. Durante diferente reunion den Parlamento, a bisa, na mas c’un ocasion el a enfatisa e deseo cu e tabata tin, no solamente mediante disertacion, pero tambe mocion, pa loke ta trata crea e balans necesario di desaroyo. Un desaroyo sostenibel pa Aruba.
Tromp-Lee a sigui bisa cu gobierno a tuma nan deseo na serio. A percura pa institui un comision, pa nan maneho ta dirigi pa crea e balans aki. El a remarca cu su preocupacion ta e parti di e impacto cu mas hotel lo tin pa Aruba. E no a trec’e solamente den su preocupacion pa loke ta trata herencia cultural y natural, pero tambe den e impacto cu tin riba infrastructura di Aruba den su totalidad. Akinan el a referi na entre otro enseñansa, careteranan, fondonan di AZV y SVb y asina por keda menciona.
E parlamentario a expresa tambe e impacto cu esaki tin riba mercado laboral. “Esey ta e preocupacion mas grandi cu mi tabata tin”, a bisa. Esey tabata pone cu e ta trece den conexion cu e otro areanan cu el a menciona. Mas construccion di hotel ta bay conduci na mas necesidad pa yena cuponan di trabao, a subraya. Ora di construccion, e ta un tipo di trabao temporal, pero unabes cu e hotel aki ta dunando servicio e ta bay tin impacto riba e necesidad di yena cuponan di trabao duradero y eynan e problema ta, a señala. Esaki no ta un realidad di awo, pero di basta aña caba, cu e cuponan di trabao, por ehempel den hotelnan den cierto funcionnan, e hendenan local no ta desea di eherce nan mas. Esakinan tin cu importa nan, a enfatisa.
Parlamentario Shailiny Tromp-Lee a sigui bisa cu otro aspecto ta cu e cadenanan internacional cu ta bin Aruba ta desea di tin nan propio profesionalnan den servicio unabes nan inicia. Esaki ta crea retonan pa e hendenan local y riba e mercado. “Pesey esey tabata mi preocupacion e tempo ey y ta keda mi preocupacion te dia di awe. Pero mi ta keda enfatisa cu e gobierno aki a hereda mas cu 7 mil camber di hotel cu di un manera of otro a keda duna. E por tabata mediante opcion, un carta, un toezegging. Con pisa esakinan tabata esaki ta e sondeo y inventarisacion cu gobierno a realisa”, a agrega.
For di e 7 mil cambernan, esaki por a keda reduci te na un cantidad di 2 mil camber. Awor cu por haya cu e 2 mil cambernan aki tambe ta di mas por ta. E pregunta ta ora cu a haci e sondeo lo a costa Pais Aruba hopi placa pa por a ‘get rid’ di e compromisonan cu tabata tin riba mesa, e Parlamentario a indica.
Shailiny Tromp-Lee a finalisa bisando cu esaki ta un preocupacion “di nos tur”. Mester realisa cu si ta bin mas desaroyo, vooral di cierto terenonan cu ta rekeri importacion di trahado, e ta bay tin un impacto riba tur parti di e sociedad na Aruba. Mester ta consciente cu Aruba a sigui desaroya y tin necesidad. Tin mester di cuponan di trabao pa tur esnan cu tin subi mercado laboral y lastimamente te cu dia di awe turismo ta e unico pilar economico cu Aruba tin y ta e sector cu mas ta crea cuponan di trabao aki na Aruba. “Esey ta nos realidad”, a expresa.