Den e reunion publico cu Minister Wendrick Cecilia, Parlamentario Xiomara Maduro a pone enfasis riba un pregunta fundamental: e Ley di Aruba Tourism Authority (ATA) ta permiti cu fondonan di turismo wordo uza pa paga maneho y proceso di desperdicio na Aruba?
E limite di e Ley di ATA
Segun Xiomara Maduro, e Ley di ATA ta hopi cla. ATA a wordo crea cu un meta specifico: promove turismo pa Aruba y ta encarga cu tur actividadnan di mercadeo cu ta fortalece Aruba como destinacion turistico. Den ningun parti di e ley no ta menciona cu ATA tin e tarea of e responsabilidad pa financia limpiesa, recoge of procesa desperdicio. “Promove un destinacion limpi no ta mesun cos cu paga pa procesa sushi,” Maduro a declara.
Un destinacion limpi ta importante pa turismo, pero e responsabilidad operacional pa maneha desperdicio ta pertenece na otro entidadnan cu ley ya a designa pa e tarea ey. Durante e reunion publico, Minister Cicilia a argumenta cu e proyecto ta cay bou di “destination management”. Sin embargo, Maduro a indica cu despues di scucha tur splicacion, e ta haya e impresion cu Gobierno a cuminsa cu un accion di limpiesa y despues a busca un manera pa financia esaki.
Falta di un Plan Integral
Segun e parlamentario, e campaña di limpiesa den bario “Baki den Bario” a cuminsa haciendo uzo di presupuesto di Gobierno. Ora e presupuesto a caba, Gobierno a recuri na ATA pa por sigui financia e proyecto. “Mi no ta mira cu tabata tin un plan integral for di principio cu claramente a establece ken lo paga, ken lo ehecuta y con e proyecto lo wordo sosteni riba largo plaso,” Maduro a bisa.
E parlamentario a expresa tambe preocupacion cu e mandato di ATA ta wordo interpreta cada biaha mas amplio pa por cubri gastonan cu originalmente no ta cay bou di su responsabilidad legal. Maduro a recorda cu Aruba ya tin entidadnan cu ley a encarga cu maneho di desperdicio, manera Serlimar, y tambe tin un ministerio cu ta encarga cu medio ambiente. Ademas, pa inversionnan cu ta fortalece e producto turistico, Gobierno tin otro instrumento financiero cu ta e Tourism Product Enhancement Fund (TPEF).
E pregunta ta: pakico e responsabilidad aki no a keda unda naturalmente e ta pertenece? Si cada biaha un ministerio no tin suficiente presupuesto nos ta amplia e mandato di otro institucion, unda nos ta pone e limite?
Durante su intervencion, parlamentario Maduro tambe a dirigi varios pregunta na e Board di ATA, cu a aproba e proyecto. Entre otro, el a cuestiona:
Ki experticio e Board tin riba maneho di desperdicio?
Con nan a determina cu e compania priva tabata e miho opcion?
Tin algun estudio independiente of informe tecnico cu a sostene e decision?
Of e Board simplemente a confia riba informacion presenta?
Maduro a enfatisa cu esakinan no ta preguntanan politico, sino preguntanan di bon gobernacion.
Pa ilustra e preocupacion, e parlamentario a plantea un serie di preguntanan retorico: “Si nos acepta cu ATA por paga cualkier proyecto simplemente paso e ta beneficia turismo, e ora ATA lo por paga asfalt, polis, hospital of casnan pa trahadornan di turismo tambe? Tur e cosnan ey tin influencia riba turismo, pero ningun hende lo bisa cu ATA mester financia nan.”
Peticion pa un opinion legal di DWJZ y CAD
Segun Maduro, precisamente paso tin tanto diferencia di interpretacion riba e Ley di ATA, ta importante pa e discusion sali for di opinionnan politico. Pa e motibo aki e parlamentario a propone e minister pa laga Directie Wetgeving en Juridische Zaken (DWJZ) y CAD emiti un opinion legal independiente riba e pregunta simpel: E Ley di ATA ta permiti pa fondonan di ATA wordo uza pa financia maneho y e proceso di desperdicio na Aruba?
“Si e contesta ta si, pueblo lo sa. Si e contesta ta no, pueblo tambe lo sa. Pero loke Aruba mester ta claridad,” Maduro a conclui.
“E ta precisamente den momentonan manera esaki cu bon gobernacion ta mustra su balor. Bon gobernacion no tin miedo di un opinion legal independiente. Bon gobernacion ta busca claridad, ta respeta e ley y ta cuida cu cada florin di pueblo wordo gasta conforme e proposito pa cual e fondo a wordo crea. Esaki no ta solamente den interes di ATA, sino den interes di bon gobernacion y di Aruba henter.”