Mientrastanto cu pueblo ta mira con proyectonan di placer personal y di bista ta haya tur prioridad y placa di gobierno di Aruba y leynan cu no ta prioridad, e fundeshi legal pa proteha nos bida, awa, tera y aire ta wordo lubida deliberadamente den un cashi.
Tin un atraso structural den nos legislacion di medio ambiente. E realidad ta doloroso: Aruba ta ricibi un montante structural di 20 dollar na entrada di cada turista cu ta bishita nos isla, pero te asina leu nada no ta organisa, implementa of inverti debidamente den e proyectonan cu realmente e leynan aki mester sostene. Banda di esey parlamento ta drumi y no ta traha riba leynan pa Aruba, pero riba leynan cu kisas tin metanan no na beneficio di Aruba.
Tin un falta di vision y structura di e gobernantenan actual. Ta na cla un lista di conceptonan di ley fundamental cu ta drumi pa añanan largo sin cu Parlamento of Gobierno ta haci un esfuerso pa implementa nan:
- Wet milieubeheer: wardando den chashi desde 2012.
- Waterwet: wardando den chashi desde 2017.
- Afvalverordening: wardando den chashi desde 2019.
- MER-verordening (Milieueffectrapportage): wardando den chashi desde 2019.
A pesar cu e leynan aki ta den conceptualisacion pa añanan largo, e politiconan ta scoge pa enfoca riba plantamento di palo pa propaganda of asuntonan cu ta duna un “bon bista” politicamente, sin resolve e problematica di rais. “Un minister por planta un palo y cu esey duna speransa. Pero e mesun minister ey tin e obligacion di percura pa tin leynan cu ta evita cu nos ecosistema ta sigui disparce.
Placa di turista ta drenta, pero pa kico e ta bay?
E desbalanse den e maneho actual ta bisto. Mientras cu tin un entrada financiero sigura a traves di e fondonan cu ta wordo cobra na e turistanan na nan yegada, e inversionnan structural no ta wordo dirigi na e areanan di mas critico. Costanan manera Mangel Halto, Baby Beach y e parti west di Aruba ta bou de un presion enorme debi na e trafico di boto, uzo recreativo destructibel, e problematica serio di awa sushi (afvalwater) y un control of handhaving masha debil mes.
Sinembargo, en bes de enfoca riba crea normanan structural pa calidad di awa, tera y aire, e enfoke gubernamental ta keda focus riba proyectonan di placer personal y di interes partidario, laga e leynan principal keda un simpel papel formal den un lachi bieu. E prioridadnan di Gobienro AVP-FUTURO ta fatal.
Un yamada pa legalidad y no pa propaganda
A enfatisa cu si e leynan aki keda sin wordo pasa pa Parlamento den e añanan nos dilanti, esaki no por wordo yama un simpel structural delay mas, sino un forma directo di negligencia gubernamental (bestuurlijke nalatigheid) contra e naturalesa di Aruba y e generacionnan futuro. Proteccion di medio ambiente no ta un fabor, sino un derecho humano fundamental mara na e EVRM.
Aruba no tin mester di mas promesa bunita ni di proyectonan di bista pa sacia interesnan personal. E pueblo y e naturalesa tin mester di un fundeshi legal structura, un control debido y e implementacion di e leynan cu ya pa mas di un decada ta wordo scondi den e cashinan di decision politico.