PLAN International, un di e organisacionnan global mas reconoci riba derecho di mucha y proteccion juvenil, ta continua reforzando su rol na Caribe atraves di sosten directo na Aruba. E federacion ta ofrece guia técnico, apoyo estratégico y planificacion pa mehora educacion riba sexualidad den un marco seguro y adapta pa realidad di nos hoben.
Den esaki, Sra. Ashley Bryant, Lider Global di PLAN International den area di sexualidad, bienestar y proteccion di hoben, a yega na Aruba pa traha directamente cu Famia Planea riba nan proyecto nobo.
Segun Bryant, su prome impresion di Aruba tabata “grandioso”, destacando su apreciacion pa e calidez di pueblo arubiano y compromiso di e institucionnan local. Aunke e a disfruta di su estadia, e a enfatisa cu su meta principal tabata pa duna sosten concreto y profesional na Famia Planea, pa fortalece e impacto y calidad di e programa di educacion sexual.
Bryant a agrega cu, pa un isla chikito cu recurso limita, colaboracion internacional ta esencial pa mantene programa educativo moderno, seguro y basa riba standard global. E tipo di alianza aki ta garantiza cu nos muchanan ta risibí orientacion y informacion cu ta protehé nan, empodera nan y prepara nan pa un futuro saludable.
