Bonaire

Pueblo kier sa kon ta para ku negosashonnan di su refineria!


Partido MAN a tuma nota ku tin diferente reunion a tuma luga entre Gobiernu, RdK / CRU, Team Negoshado, kontratistatanan i tambe sektor komersial relashona ku nos refineria. Ademas MAN a tuma nota di diferente komunikado ku RDK a emiti ku informashon na eks-empleado(nan) di refineria entorno pago(nan) pendiente etc.

MAN no tin nada kontra di tur reunion nan ku ta wordu tene ku diferente stakeholders. 

Sinembargo, MAN kier pone bon kla ku ta insolito ku tin diferente reunion ta tuma luga mientras ku Frakshon di MAN a dirigi karta dia 1 di aprel 2022 ku petishon pa un reunion di Komishon Sentral pa Parlamentu por hana informashon riba desaroyonan enkuanto  refineria Isla i tambe otro karta fecha 9 di yüni 2022 via Presidente di Parlamentu ku preguntanan entorno desaroyo di nos refineria na Prome Minister señor Pisas sin risibi ningun reakshon di Gobiernu. Esaki MAN ta konsidera un falta total di respet pa Pueblo.

MAN ta kere firme ku Pueblo tin derecho di tende via di e organo di mas haltu, esta Parlamentu kon henter e proseso relashoná ku nos refineria ta kana i te ku awor Gabinete Pisas II no a kumpli. Es mas Parlamentu foi dia 22 di ougùstùs 2013 a tuma un moshon “wall to wall” kaminda Gobiernu di Korsou ta mantene Parlamentu di Korsou riba un base regular (p.e. kada 3 luna) informá riba progreso di deliberashonnan/avansenan relashoná ku operashon di nos refineria. Lamentablemente Gabinete Pisas II no ta kumpliendo ku Parlamentu.

MAN ta bolbe enfatisa ku re-apertura di nos refineria ta di sumo importansia pa desaroyo sosial-ekonomiko di nos Pais i p’esei ta importante pa Pueblo keda bon informa. Klaro ku MAN ta para tambe pa un operashon limpi di nos refineria kaminda ta tene debido kuenta ku nos medioambiente i salu di nos Pueblo. P’esei MAN ta respetá tambe sin mas e veredikto di Wes di dia 19 di yüli 2022 kaminda normanan di SO2 mester ta igual na normanan di WHO.

MAN ta urgi Gabinete Pisas II pa informa Pueblo di forma transparente ya ku Pueblo tin derecho di sa:

  1. Kual ta e status di negosashon ku Curacao Petroleum Refinery (CPR)? Kon lew e negosashonnan ta? Tin fecha premira pa firma e “Heads of Agreement”(HoA)?
  2. Kon ta para ku “proof of funds” i “proof of products” di CPR? Esaki nan ta garantisa prome ku firma e HoA?
  3. Kon ta para ku e lei di medioambiente? Ki dia esaki ta yega Parlamentu pa wordu trata? Por firma HoA of otro kontrakt sin ku e lei di medioambiente drenta na vigor?
  4. Kon ta para ku operashon di Bullenbaai? Ta bai firma un kontrakt pa operashon di Bullenbaai ku CPR separa foi un kontrakt di operashon di tantu Bullenbaai i Emmastad den un pakete? Kiko ta e motivashon pa hasi esaki? 
  5. Kiko ta kontenido di e kontrakt ku kier firma pa operashon di Bullenbaai? Kiko ta e benefisionan? Kuantu kupo di trabou esaki ta genera?
  6. Dikon a skohe pa firma un kontrakt pa operashon di Bullenbaai separa for di un kontrakt integral Bullenbaai i Emmastad?
  7. Kiko ta pasa ku e kontrakt di Bullenbaai si akaso no yega na akuerdo pa operashon di Emmastad i Bullenbaai den un (1) solo pakete?
  8. Kuantu miembro tin aktualmente den Hunta di Komisario di RdK? Hunta di Komisario, Bestuur di RdK i Gobiernu/AVA awor si ta riba mesun liña pa lokual ta trata eskoho di e “preferred bidder”?
  9. E akontensimentu nan ku tabata tin den Hunta di Komisario di RdK a afekta e negosashonnan pa yega na un partner nobo? 
  10. Kon ta para ku enbolbimentu di sindikatonan di empleadonan di refineria i tambe kontratistanan? Ta tene debido kuenta ku derechonan di tur trahado di sindikatonan durante negosashonnan?

Related posts

Treinen di desaster riba eskala grandi na bia

EA News Author

Kolegio Ehekutivo ta intensivá konsulta ku sektor empresarial

EA News Author

Prome cu a intruduci e ley di landa y piscamento a sinta cu diferente piscado

EA News Author

Leave a Comment