Den marco di e simposio “Brug entre generacionnan,” e conoci orador Fredy Gonzales a presenta un reflexion profundo tocante e historia di sclavitud den e region di Caribe. Gonzales a enfatisa cu e meta di e simposio aki ta pa uni comunidad reflexiona riba kico realmente a pasa cu nos historia, nos origen, y e derecho inalienabel cu nos yiunan y nietonan tin di conoce e berdad di nos pasado. Sclavitud tabata un sistema forsa pa gobiernonan; nos mester tin orguyo di e desendientenan cu a sali padilanti, pero si nos mester mira awe, gobierno di AVP-FUTURO hunto cu Hulanda no ta ripiti historia di sclavitud den un bachi moderno ?
Gonzales a habri su discurso bisando cu e historia aki no mester trece berguensa pa nos, sino al contrario, e mester duna nos un sentimento di orguyo. El a splica cu maske un gran cantidad di persona a wordo treci na e tera aki na un manera forsa, nan desendientenan a logra surpasa e adversidad, sali padilanti, y awe nos ta testigonan bibo di e logro ey. “Boso ta un muestra di esey, boso ta aki,” e orador a expresa na e publico. E bida teribel cu e esclavonan a pasa y biba no mester pasa nunca mas , nan a lucha y awe door di e lucha ey pa libertad, nos tin un miho bida cu nos a biba awe.
Durante su presentacion, Gonzales a splica cu e cifranan di e trafico di catibo ta aproxima, ya cu ta hopi dificil pa sa exactamente cuanto persona a wordo saca for di Africa contra nan boluntad. Sinembargo, investigadonan ta calcula cu un cifra hopi creibel ta di 12 miyon y mei di persona (12,500,000) cu a wordo capta durante un periodo di mas of menos 300 aña. E 300 añanan aki, cu ta representa tres siglo di historia, tabata e tempo caminda hopi pais Europeo a participa activamente den e negoshi aki, entre nan Portugal, Spaña, Francia, Hulanda e Inglatera.
Pa duna un definicion cla di kico tabata un catibo den e contexto historico aki,
Gonzales a splica:
Un esclavo tabata un persona casa, secuestra, raptá y bendi pa via di forsa… carente di libertad di movemento fisico, di opinion y di amparo huridico. E no tabata doño di su mes, y tabata obliga na traha sin pago.
Un di e puntonan di mas importante cu Gonzales a bisa ta cu sclavitud tabata un norma y un ley formal cu a wordo autorisa pa gobiernonan di e epoca ey. El a aclara firmemente cu esaki no tabata un mandato divino ni un orden di Dios, sino un decision tuma pa sernan HUMANO den FUNCION DI GOBIERNO pa permiti e captura, desraisa y transporte di persona for di nan tera.
E sistema aki den America a funciona pasobra e personanan tabata wordo saca for di nan hogar y transporta den barconan durante biahanan largo di dos luna pa un luga completamente desconoci pa nan. E mayor parti a wordo somete pa asina salba nan bida, pero Gonzales a recorda e resistencia tambe: hopi persona a lansa nan mes for di e barconan, preferiendo muri hoga cu biba den sclavitud, mientras cu otronan a muri durante e travesia pa via di enfermedad of hamber.
Finalmente, e orador a subraya un aspecto crucial cu hopi biaha ta wordo lubida: Nada di esaki tabata boluntario”. Inclusivo, el a splica con hopi rey di tribunan Africano a participa den e sistema aki, RICIBIENDO PLACA DI E EUROPEONAN pa captura miembronan di otro tribu y bende nan mara. Gonzales a conclui reitera cu henter e structura tabata structuralmente forsa pa via di PODER POLITICO y economico di e tempo ey.