PoliticaFeatured

Secretario General di MEP Endy Croes: Lucha y logro di Betico Croes ta un clompi di diamanta

Secretario General Di Mep Endy Croes

Secretario General di MEP Endy Croes ta felicita henter pueblo di Aruba cu e celebracion di Dia di Betico e siman aki 25 di januari proximo. 

Ken ta Betico?

Betico Croes a nace dia 25 di januari 1938 y si Betico tabata na bida e lo a cumpli 85 aña di edad e aña aki. Betico a bin di e pueblo humilde di Santa Cruz y ta yiu di † Panchico y † Mimita. Betico tabata felizmente casa cu Glenda y tin 4 yiu, esta Gisette, Glenbert, Junior y Gleneline (Lalo). Nomber corecto di nos Libertador Betico Croes ta Gilberto Francois (Betico) Croes. Betico tabata gusta deporte y musica. No solamente Betico a dirigi koor di Inmaculada Concepcion Parish na Santa Cruz, pero Betico tabata tin su propio grupo, esta “Betico y su Grupo”, cu ta pasa cas pa cas fin di aña tocando su acordeon y sonando e dande. Despues cu Betico a fayece, e grupo a cambia di nomber y a bira “Grupo di Betico”. Betico a bay scol basico y a continua HBS na Sint Dominicus College. Betico a sigui su estudio na Hulanda na Hilversum y a bira maestro di scol. Betico a regresa Aruba y a traha seis (6) aña na Sint Jozef School, cual awendia ta yama Colegio San Hose. Betico a sigui studia y a haal LO den Handelskennis y LO Spaans. Despues, Betico a traha 2 aña na Colegio San Antonio na Santa Cruz di aña 1965 pa 1967. 

Betico su amor pa Aruba:

Betico tabata tin un amor inmenso pa Aruba y a dicidi di subi lista politico pa duna aporte na su pais di un otro forma. Na aña 1971, Betico a separa di Partido di Pueblo Arubano (AVP) y riba 9 di februari di aña 1971 a lanta su propio partido Movimiento Electoral di Pueblo (MEP). Betico su determinacion ta pa saca Aruba for di constelacion Antiyano, cu e momento ey tabata consisti di 6 isla, cual e isla mas grandi cu ta Curaçao tabata esun dominante. Betico a bringa y lucha pa nos Status Aparte. Un lucha incansabel di 15 aña prome cu Betico a logra. E lucha no tabata uno facil.

Algun parti di e lucha: 

Na augustus di aña 1972, Betico a forma parti di delegacion di Reino Hulandes pa bay Suriname. Betico a plantia bek e idea di Status Aparte, pero lamentablemente otro politiconan a bisa cu Betico no por papia den nomber di Aruba como cu MEP e tempo ey a saca 7 asiento den su prome salida y Betico ta representa 7 asiento. Betico a bisa nan: “Mi ta bay consulta cu mi pueblo y lo mi bolbe”. Dia 18 di maart di aña 1973, Betico a organisa un manifestacion masal den Wilheminastadion, cual awendia ta yama Guillermo Prospero Trinidad Stadium. E manifestacion aki a haci un impacto enorme, mirando cu e parlamentario Hulandesnan tabata na Aruba.

Betico a unifica pueblo cu Himno y Bandera:  

Den e proceso Betico a boga pa union pa asina henter e pueblo por sostene e lucha. Betico a forma un comision pa Aruba por haya su propio himno y bandera. Dia 18 di maart di aña 1976 nos bunita bandera a bay halto den Wilheminastadion y nos himno Aruba dushi tera a resona. Esaki a crea un impacto di orguyo den nos Arubianonan, unda mas y mas hende cu un amor patria a acerca pa sostene e lucha di Status Aparte. Dia 25 di maart di aña 1977, a organisa un referendum pa pueblo mes por dicidi nan futuro a traves di Voz di Pueblo ta Voz di Dios (Vox Populi, Vox Dei). Lamentablemente, AVP cu su Lider nobo e tempo aya esta, Henny Eman, a pidi tur hende pa NO bay vota y a pidi tur hende pa bay lama pasa dia cu famia. Henny Eman no a logra su intento pa boicotia e referendum. Pueblo a reaciona masalmente cu 82.5% di voto na fabor di Status Aparte. Aprobando di e manera aki e lucha di Betico cu un sosten incondicional.

Augustus Scur na aña 1977:

Na aña 1977, MEP a obtene 5 di e 8 asientonan pa cu Parlamento di Antias durante eleccion. Lamentablemente, Gobierno Central yuda pa Partido Patriotico di Aruba (PPA) e tempo aya a laga MEP for di gobierno. Esaki a trece cu ne un ola di manifestacion cu a desemboca den augustus scur. Durante e manifestacion masal aki, WEB su servicio strategicamente a cay afo y Aruba a bay den blackout. Gobierno di turno e momento ey a manda refuerso SEdi Riot Commando di Curaçao pa purba trece trankilidad. Tironan a cay riba nos hendenan, cual tambe ta forma parti historia. Riot Commando hasta a drenta cas di mayornan di Betico na Santa Cruz na un manera inhusto. Sinembargo, esakinan no a frena of stop Betico pa sigui cu e lucha. Na 1978 Betico ta wordo encarcela pa shete (7) dia, momento a haya un revolver bou di asiento di su auto, mientras nunca por a prueba cu e revolver ta di dije. Hopi triki a wordo uza pa purba spanta Betico.  Pueblo a compaña Betico pa hib’e prizon na Dakota e tempo aya. Betico su palabranan historico: “No tin lucha sin sacrificio y no tin sacrificio sin gloria!”

Aruba ta logra Status Aparte:

Dia 12 di maart di aña 1983 durante Conferencia di Mesa Redonda na Den Haag, Ruud Lubbers a expresa na final e palabranan historico: “De Kogel is door de Kerk”. Akinan Betico y delegacion den nomber di Aruba a logra convence e Hulandesnan y asina Aruba a haya su Status Aparte entrante 1 di januari di aña 1986. Pues, tabatin 3 aña pa prepara esaki. 

Betico ta wordo tira:

Dia 24 di april di aña 1983, Betico yegando Stadion Nadi Croes/Crismo Angela (veld di Winston antes) a wordo tira pa un agente policial Libier.  E multitude di hende presente y pueblo a bay for di control. E polisnan mester a bandona e sitio pa por a purba calma pueblo. A hiba Betico Merca y despues di varios operacion Betico a recupera y a sigui cu e lucha. Finalmente, dia 31 di december di aña 1985, rond 9’or di anochi, tres (3) ora prome cu aña nobo, cu mester a celebra e logro di Betico y su lucha, Betico ta accidenta y bay 11 luna den coma. Betico a fayece na Hulanda na un edad di 48 aña y nunca a biba pa mira su propio lucha wordo cristalisa. 

Betico a laga logronan grandi atras:

Betico cu Status Aparte a logra pa Aruba tin su propio: gobierno, parlamento, gobernador, procurador general, banco central, moneda, himno, bandera y ortografia. Pues, a laga un herencia valioso pa nos y manera Betico a bisa na su yegada for di Hulanda: “Laga locual nos a logra awe ta un clompi diamanta”. Dia cu nos Status Aparte mester wordo menasa atrobe, esaki ta significa guera. Danki Betico. Ban celebra Dia di Betico en grande y traspasa e bunita historia aki pa nos yiunan y nos futuro generacionnan.

Betico Croes

Related posts

Minister Geoffrey Wever: Por registra pa curso Finansas den mi Hogar na San Nicolas

EA News Author

Awa di bebe na boneiru awor ta ser produsí 100% dor di web boneiru

EA News Author

Monumentenfonds Aruba rumbo pa 25 aña di existencia.

EA News Author

Leave a Comment

Whatsapp Message