Konseho Sosial Ekonómiko (SER) di Kòrsou a tene un diskurso importante dia 23 di yüli último, representando e Asosiashon Internashonal di Konsehonan Ekonomiko i Sosial i
Institushonnan Similar (AICESIS), durante e segmento ministerial di e Foro Polítiko di Nivel Haltu di Nashonnan Uní (HLPF), ku a tuma lugá bou di e ouspisio di e Konseho Ekonómiko i Sosial di Nashonnan Uní (ECOSOC) na sede sentral di e organisashon na New York. Kòrsou aktualmente ta karga e presidensia di AICESIS, un responsabilidat ku e òrgano asesor lokal a usa pa haña atenshon mundial pa stratégianan inklusivo, duradero i basá riba siensia, alineá ku e metanan di e obhetivonan di desaroyo sostenibel (SDG’s) di Nashonnan Uní.
Den su diskurso, representando AICESIS, Sr. Raúl Henriquez, direktor i sekretario general di SER Kòrsou, a resaltá e nesesidat urgente di reenforsá kooperashon multilateral. Henriquez a hasi un yamada na e estadonan miembro pa renobá nan kompromiso ku sinku SDG’s prioritario: salú i bienestar (ODS 3), igualdat di género (ODS 5), trabou digno i kresementu ekonómiko (ODS 8), bida submarino (ODS 14) i aliansanan pa logra e metanan (ODS 17). Aunke a rekonosé progreso signifkativo, e direktor a alertá ku desigualdannan persistente ta sigui eksigí rekursonan polítiko koordiná i basá riba evidensia empíriko.
E ponensia aki ta basá riba un dokumento di posishon prepará pa AICESIS, ku a kolektá eksperiensianan di su miembronan na Brasil, Camerun, Chad, Maròko i Zimbabwe. Henriquez a presentá kasonan ilustrativo manera e reforma eksitoso di sigurdat médiko na Maròko i e ekspanshon di akseso na kuido médiko pa gruponan vulnerabel na Brasil, pero tambe el a indiká desafionan struktural serio manera matrimonio infantil, informalidat laboral i falta di integrashon ekonómiko pa hobennan, konosí komo Grupo Neet (hobennan ku no ta studia i no ta traha).
Promé ku e presentashon na e seshon plenario, e delegashon di AICESIS a sostené reunionnan bilateral ku e mishon permanente di Brazil na Nashonnan Uní, dirigí pa señor Lavito Person Motta Bacarissa, sekretario ehekutivo di e Komishon Nashonal di SDG’s di e Presidensia di e Repúblika Federativo di Brazil. Durante e reunion aki, a keda konfirmá ku e konseho sosio-ekonomiko brasileño, esta e Conselho Nacional de Desenvolvimento Econômico e Social (CDES), lo bira parti di e hunta di atministrashon di AICESIS entrante 1 di novèmber prٕóksimo. E moveshon aki ta reflehá e kompromiso kresiente di Brazil den e ret di AICESIS i ta enfatisá e ròl kada biaha mas importante di Latino-Amérika den e agènda di sostenibilidat di e organisashon. Pa fortalesé e lasonan regional ku Brasil, ku tin influensia internashonal grandi, Sra. M. Sboui-Racamy, Vice-Sekretario General di AICESIS pa region di Latino-Amérika i di Karibe i asesor mayó na SER di Kòrsou, tambe a forma parti di e delegashon.
E delegashon a realisá, mas aleu, un bishita di kortesia na embahador Sr. Lok Bahathapa, representante permanente di Nepal na Nashonnan Uní i vise-presidente di ECOSOC pa e seshon di 2025, puesto pa kua e la wòrdu eligí na yüli 2024. Durante e enkuentro aki, a diskuti e periodo entrante den kua Nepal, bou di liderasko di embahador Bahathapa, lo asumí e presidensia di ECOSOC, komo susesor di e presidente aktual, ku ta embahador Sr. Bob Rae di Canada. E reunion ta marka inisio di un aliansa stratégiko ku e liderasgo entrante di ECOSOC, dunando AICESIS asina ei e oportunidat pa partisipá mas aktivamente den formulashon di maneho sosioekonómiko global.
Ku su partisipashon den e debate plenario i e reunionnan diplomátiko stratégiko aki, SER Kòrsou, komo aktual presidente di AICESIS, a reafirmá e relevansia di konsehonan sosio-ekonomiko den gobernashon internashonal. E eventonan a demostrá kon institushonnan mas chikí por usa retnan diplomátiko i interkambio di konosementu pa influensiá maneho global riba inklushon sosial, hustisia ekonómiko i desaroyo sostenibel.
