SabaFeatured

Subsidio di coriente pa famianan di entrada abou na Saba

Subsidio Di Coriente Pa Famianan Di Entrada Abou Na Saba

E entidad publico di Saba ta haci un subsidio di un biaha di 1300 dollar destina pa famianan di entrada abou. E subsidio aki mester yuda e grupo di residente aki cu nan cobransa di coriente durante e periodo cu prijs di energia a aumenta.
Residentenan cu entrada abou, te cu cierto suma, por aplica pa e subsidio aki denter di poco.

E financiamento pa subsidio di energia ta bini di Ministerio di Asuntonan Social y Labor (SZW) y Ministerio di Asuntonan Economico y Clima (EZK), y lo wordo manda pa entidad publico Saba.

E asistencia financiero ta specificamente pa viviendanan cu menos entrada pa yuda alivia e peso di e aumento di gastonan di energia.

Gobierno di Hulanda a dicidi cu e subsidio por wordo uza solamente pa e viviendanan di entrada abou. A pone un limite (blafon) di entrada y basa riba e cantidad di personanan den e famia. E limitenan di entrada ta aparece den e formularionan di aplicacion cu ta disponibel online y tambe na diferente localidad unda cu residente por recoge un hard copy. Solamente residentenan di Saba ta cualifica pa esaki.

Aplicantenan mester entrega algun documento hunto cu e formulario cu nan yena.
Basa riba informacionnan duna door di e aplicante, un comision lo evalua cada peticion y determina si un persona ta eligibel pa subsidio, e informacion aki lo wordo comparti cu Saba Electric Company (SEC)
E un pago di 1300 dollar lo wordo deposita directamente riba e cuenta di e ciudadano na SEC. Pues e subsidio lo no wordo paga cash.

Cu e constante aumento di prijsnan di energia, Saba a haci diferente subsidio na SEC pa suavisa e impacto di esaki riba consumidornan di Saba. Na juli di e aña’ki, Saba a otorga un subsidio special na SEC pa yuda consumidornan cu e diferente aumentonan pa e periodo di juli pa december, 2022 pa di e forma aki e aumento den e recibonan di tarifa ta keda limita na un aumento di 10%. Sin e subsidio aki, e facturanan di coriente lo a conoce un aumento di casi 30%.

E prome subsidio a cubri e periodo di juli pa december 2021 cu a yuda limita e aumento di e tarifa variabel. Pa 2022 e entidad publico a otorga un subsidio pa e tarifa fiho, cu a reduci e tarifa na zero pa cada KVA (kilovolt-ampere) category.
Saba a haci un apelacion na consumidonan pa tuma medida pa spaar e uzo di coriente. Por spaar den e consumo door di por ehempel paga airco y luznan ora no tin hende den un camber, instala luznan LED y uza dryer menos posibel.

Related posts

Casi 1000 persona a haya nan vacuna of booster shot

EA News Author

Prome minister a haci traspaso di mando na nos Prins y Pachonan cu lo dirigi nos carnaval 70

EA News Author

Aruba ta ofrece varios opcion pa engrandece oportunidad laboral pa nos hobennan

EA News Author

Leave a Comment

Whatsapp Message