Tourism Corporation Bonaire (TCB)
orguyosamente a representá Boneiru na e Travmedia International Media
Marketplace (IMM) 2026, ku a tuma lugá dia 22 di yanüari 2026 na New York City.
IMM ta un evento mundial di ret importante ku ta trese sektor di biahe den kontakto
ku periodistanan, freelancernan, redaktornan, influencernan i presentadónan
prominente di kanalnan prestigioso di medionan di komunikashon. Partisipashon di
TCB na e evento di IMM di e aña akí a enfoká riba fortifikashon di relashon ku
medionan di komunikashon i fihamentu di atenshon riba e oferta variá di nos isla.
Durante e evento di IMM di e aña akí, TCB a pone énfasis riba importansia di un
‘eksperensia Boneiru’ mas personalisá, pa medio di destaká desaroyonan nobo pa
aña 2026 i mustra e meskla úniko di naturalesa, kultura, sostenibilidat i e ofertanan
kulinario di nos isla. For di eksperensianan nobo te e faboritonan di tur tempu: ku
hopi entusiasmo e partisipantenan ku tabatin un enkuentro ku e tim di Boneiru a
risibí Boneiru su kompromiso kontinuo ku turismo responsabel i eksperensianan
outéntiko.
TCB tabatin un agènda yen i ku éksito a tene 24 sita individual ku representantenan
di medionan prominente di komunikashon, manera Fodor Travel, Travel & Leisure,
National Geographic, Lonely Planet, Condé Nast Traveler, TravelPulse, Toronto Star
i otro prestigioso publikashonnan internashonal. E enkuentronan akí a hasi
kòmbersashonnan profundo i kontaktonan direkto posibel ku partnernan importante
di medionan di komunikashon, ku ta interesá den un bishita na Boneiru pa traha un
‘coverstory’ tokante nos isla.
“Ta esensial pa ta presente na plataformanan importante di medionan di
komunikashon manera IMM, pa sòru pa Boneiru keda ‘top of mind’ serka tantu e
bishitantenan aktual komo e potensial bishitantenan den nos merkadonan prioritario.
Un relashon fuerte ku medionan di komunikashon ta yuda nos pa kompartí Boneiru
su storia na un manera outéntiko i pa posishoná nos isla komo mas ku solamente un
eksperensia di un biaha só,’ segun Elesiër Angel, direktor di Tourism Corporation
Bonaire.
Despues di nan partisipashon na IMM 2026, e tim di TCB huntu ku Van der Valk
Plaza Beach Resort Bonaire i Divi Flamingo Beach Resort & Casino ta preparando
tambe pa partisipashon na e Travel & Adventure Show na New York. Durante e feria
akí e tim di Boneiru ta haña oportunidat pa drenta direktamente den kontakto ku
konsumidónan i kompartí inspirashon pa biahenan den futuro. E Travel Adventure
Show na New York ta tuma lugá den Jacob K. Javits Convention Center dia 24 i 25
di yanüari 2026.
Tourism Corporation Bonaire ta fortifiká relashon ku medionan di komunikashon na Travmedia's International Media Marketplace 2026
