ORANJESTAD,Aruba
E comunidad di piscadonan ta den tension y disgusta cu a haci hopi promesa na nan durante y despues di campaña y te ainda no a cumpli cu nan. Di informacionnan cu nan a ricibi, awor ta mustra cu ta Minister di Medio Ambiente, Marisol Lopez Tromp ta esun cu tin nan den limbo.
Pa hopi tempo caba e piscadonan cu ta uza speargun a bin ta papiando cu pa motibo cu hopi di e piscadornan ta haci uzo di esaki pa trece of pone cuminda tur dia riba mesa. Sinembargo tin prohibicion pa uzo di esaki. Inclusive si haya nan cu e speargun tanto esaki como cu piscanan ta wordo confisca.
A haya promesa cu lo elimina esaki. Recientemente ainda tabatin un caso asina cu a confisca basta pisca di un meneer cu ta pisca pa pone cuminda riba mesa na su cas y no pa haci negoshi. Awo nan a bin tende cu e asunto ta practicamente regla. Pero ta tres Minister mester firma e documentonan cu por cana su caminda, despues di haya e aprobacion. E unico cu falta pa firma ta minister Marisol Lopez Tromp. Esaki ta di lamenta di e actitud di e mandatario.
Esaki a lanta asombro di e piscadonan y no ta compronde e motivacion di e mandatario pa no pone su firma riba e papel. Nan ta haci un apelacion na e mandatario pa coopera cu e comunidad aki. Nan kier sa e motibo pakico te ainda e no a firma e cambionan necesario. “Nos ta den un situacion di crisis, unda cu no tin trabou. E unico forma cu por yuda un parti di pueblo cu nan alimento ta pisca,” tabata e mensahe.
Mientras cu e ordo no yega cerca Guarda Costa pa no persigui nan, nan no por drenta awa cu speargun. Nan ta spera cu e problema aki wordo resolvi pronto