Den un conferencia di prensa yena cu dolor inmenso, Edvin Willems, yiu homber di e victimanan di e accidente fatal recien, a bin padilanti pa pidi husticia pa su mama y su stiefvader. Willems a expresa cu e famia ta papia di bida di “hende decente” y a critica fuertemente cu, te dia di awe, ni un “sorry” a wordo dirigi na e famia pa loke a sucede.
Willems a gradici Ministerio Publico (OM) y e fiscal pa e tremendo investigacion cu a wordo realisa. El a destaca cu, pa prome biaha den historia di Aruba, un chauffeur bebi y iresponsabel cu a kita bida di dos ser humano lo por haya un castigo ehemplar, loke a wordo cualifica como un intento di asesinato of asesinato.
Durante su declaracion, Willems a enfatisa cu nan no a nota ningun tipo di empatia of arepentimento di parti di e sospechoso (Shanaya) den e sesion pro forma anterior. “Mirando cu nan no tin ningun tipo di empatia pa nos ser keri nan, nos tampoco lo tin ningun clase di empatia pa e acusado,” el a declara firmemente.
El a mustra su desapunto indicando cu e otro banda a purba di tira culpa riba e victimanan, loke ta creando rabia den comunidad y mas dolor den e familiar- y amistanan.
Willems a reacciona tambe riba e declaracionnan tocante e asistencia psicologico di e sospechoso, indicando cu e sospechoso a haya psicologo for di e prome dianan, mientras cu e mes, como yiu di e victimanan, a tarda seis luna pa haya su prome cita. El a agrega cu si e caso bay den e direccion ey, nan lo pidi via nan abogado pa aplica e midí di TBS den e sentencia.
Pa loke ta trata e defensa legal di e sospechoso, Willems a duna di conoce cu OM a desmenti caba e rumornan cu e sospechoso a keda sin derecho na un abogado. El a splica cu e abogadonan cu e sospechoso a pidi simplemente no a clasifica pa traha riba e caso aki. Segun Willems, e sospechoso a cambia di abogado multiple biaha caba, asina cu total el a yega di tin tres abogado den su proceso. Debido a e cambionan aki, el a reconoce cu tin un gran probabilidad cu e sentencia no lo cay mañan.
E yiu di e victimanan a comparti e impacto devastador cu e perdida aki tin riba e famia, specialmente riba su yiunan, kendenan tur weekend tabata custumbra di bay come ice cream y comparti cu nan wela. “Unda mi yiunan ta bay keda sinta awor? Nan tambe mester di psicologo debi na e daño cu e señora aki a ocasiona nos,” el a expresa cu hopi sentimento.
Willems a clama pa husticia pa asina e caso aki sirbi como un les pa comunidad, pa Aruba no tolera mas e asina yama ‘hit and run’. “Hende inocente no por sigui paga pa hende iresponsabel sin consenshi, lagando famianan den dolor y comunidad den shock” el a conclui.