Djasabra último Minister di Enseñansa, Siensia, Kultura i Deporte (ESKD) Sr. Steven Croes a hasi apertura di e temporada di atletismo na Sentro Deportivo Kòrsou. E apertura a start ku un tiru di minister komo señal ku temporada a habri. E dia a sigui ku varios kompetensia manera di kore, bula i tira.
Atletismo ta un di deportenan na Kòrsou ku a sa di destaká durante e añanan.
Atletanan manera Churandy Martina, Taymir Burnet, Hensley Paulina, Christopher Garia, Denzel Comenentia i e atleta femenina Nargelis Statia Pieter ku na 2018, a representá Kòrsou den e tim nashonal di Hulanda.
Atletismo na Kòrsou ta inovando. Ku e programa administrativo pa kompetensianan di atletismo: atletiek.nu, CAB (Curaçaose Atletiek Bond) a logra di trese e deporte aki na un siguiente nivel. A profesionalisá e deporte aki, pa asina por haña un bista mas amplio i mihó di e talentonan di Kòrsou.
Minister Croes tabata hopi kontentu pa mira tantu entusiasmo pa e deporte di atletismo apesar di tur e retonan ku a presentá durante aña 2020. Tambe ela mustra riba e bon trabou ku e Federashon di atletismo Kòrsou ta hasiendo pa sigui desaroyá i inová e deporte durante e añanan. Deporte ta importante pa edukashon i formashon di nos hubentut. Pa medio di deporte un mucha ta siña for di chikí norma i balor i prinsipalmente disiplina. Pesei Minister Croes ta deseá Federashon di Atletismo Kòrsou hopi éksito ku e deporte aki, pa sigui traha riba nos futuro atletanan ku lo kompetí mañan riba nivel internashonal i sigui saka kara di Kòrsou
