Siguridat i òrden públiko ta partinan importante di e portafolio di gezaghèber Edison Rijna. Den e kuadro akí durante su bishita di trabou na Den Haag na ministerio di Hustisia i Siguridat el a hiba konsulta ku señora Monique Commelin, ku resientemente nan a nombra komo direktor di Maneho Polisial i Ehekushon di Tarea i alabes direktor-general suplente di Polis i Regionnan di Siguridat. Rijna a papia tambe ku Marco Haas, mènedjer di programa pa Asuntunan Internashonal i Karibense na ministerio di Hustisia i Siguridat.
E kòmbersashon a bai entre otro tokante desaroyo di tantu Kuerpo di Bombero komo Kuerpo Polisial Hulanda Karibense, e punto sentral di konekshon marítimo ku mas despues den e aña akí nan ta habri na Boneiru i e Sentro Regional di Informashon i Ekspertisio (Regionale Informatie- en Expertise Centrum –RIEC) ku nan ta bai establesé na benefisio di Hulanda Karibense. Gezaghèber Rijna ta aploudí binimentu di ámbos fasilidat, pasobra den un grado importante nan ta kontribuí na oumento di siguridat di Boneiru.