A pesar cu nos ta biba riba un pais democratico, no por descarta cu nos ta bibando den un comunidad, unda cu poder tambe ta bon presente y ta bari democracia for di mesa. Pa fraccion di PPA, ta inaceptabel cu 124 dia a pasa, unda cu e parlamentario Otmar Oduber a pidi pa reunion publico y te ainda no a haya reaccion.
Dos Presidente Niun Contesta
Parlamentario Otmar Oduber a subraya den su entrevista, cu a pesar cu el a haci su peticion oficial na dos presidente di Parlamento, esta Gerlien Croes y Marlon Sneek, niun di dos a mustra respet pa Parlamento su Reglamento di Ordo. “Tur hende ta cobarde y nan ta coriendo pa nan responsabilidad pa no presenta nan posicion cla tocante Rijkswet, p’asina nos por discuti y uni riba un topico asina importante pa henter e pais.”
Reunion cu e gremionan comercial
Riba un iniciativa pa trece tur hende hunto, Parlamentario Oduber di fraccion di PPA, a invita e gremionan comercial pa dialoga y asina purba sera cabes y para hunto den un frente nacional riba e topico di Rijkswet. “Nos ta haciendo trabou di gobierno, door di reuni cu gremio y asina purba na sera cabes hunto, unda nos ta bisa Hulanda cu nos ta compronde nan preocupacion, ya cu e cosnan no a bay bon den pasado, pero nos por y kier atende cu e nos asuntonan na cas mes, bou di e reglanan y leynan nobo cu nos mes por crea”, Oduber a indica.
Asombro di gremio
Gremio a keda asombra y no tabata na altura cu Parlamento, como e organo di mas halto di pais Aruba, no tin e contenido exacto di e Rijkswet. Gremio tabata bou di e impresion cu Parlamento lo duna nan informacion. “Parlamento, gremio y henter e comunidad no sa kico ta pasando cu e asunto di Rijkswet aki. Imagina bo, cu nos como parlamentario a haya sa aki aya di e contenido, ora e delegacion di Hulanda a bin. Pues via e presidente di 1ste y 2de kamer y VNO nos a scucha aki aya algun cos, pero nada oficial. Mi ta djis spera cu Parlamento no haya e contenido ‘5 pa 12’, unda finalmente ta djis informa Parlamento y indica cu Gobierno mester djis ‘teken bij het kruisje’, manera cu a pasa den pasado y Parlamento ta djis sigui e wega pa sostene su gobierno”, Otmar Oduber a enfatisa.
Gobierno promoviendo deficit democratico
Parlamentario Otmar Oduber a expresa den linea cortico algun situacion, unda Gobierno mes ta e gran co-autor di e deficit democratico di Parlamento. “Djis ban corda bek tocante ‘BBO bij de grens’, cu a costa pueblo miyones. Despues ora Gobierno a tuma decision cu ATA ta bay aumenta su room tax mas cu 3%, cu a crea 70 miyon florin extra y cu a bay den caha di Gobierno, en bes cu Gobierno baha su gasto”, tabata Otmar su palabranan.
Surplus no t’ey mas
“Awe 2 di juni, mi ta bisa boso cu e 500 miyon di surplus a caba y nos ta bek na 1.1 di e norma di LAFT y Landspakket. Pues den menos di 6 luna, practicamente Aruba a consumi e 500 miyon di surplus, pasobra atrobe no tin un ley na nivel di Reino, unda nos por salvaguardia e normanan den nos leynan local, unda no djis e mayoria di Parlamento, cu ta representa e Gobierno, pero unda mayoria absoluto di dos tercera parti mester dicidi. Esey lo duna Hulanda mas trankilidad con Aruba ta anda cu su maneho financiero responsablemente” Otmar Oduber a finalisa bisando.