Minister di Finansa, Asuntonan Economico y Sector Primaria Mr. Geoffrey Wever a firma un acuerdo strategico di cooperacion cu Stichting Overheidsaccountantsbureau (SOAB) y Centrale Accountantsdienst di Aruba (CAD). E acuerdo strategico di cooperacion ta un continuacion di un relacion cu SOAB y CAD tin caba y ta fortifica e manera con e dos entidadnan aki lo sigui traha cu otro.
Tin momento cu CAD tin mester di fortificacion y assistencia ora di haci un audit di un departamento di Gobierno of un Fundacion of tin ora tin necesidad di intercambia expertisio y e acuerdo strategico di cooperacion firma awe ta ratifica e relacion ey.
Gabinete AVP-FUTURO, a acorda den su acuerdo di gobernacion cu lo garantisa un maneho financiero transparente, etico, eficiente y eficaz y un control interno financiero ta sumamente importante.
“Ta importante pa e control financiero por tuma lugar y pa e motibo aki a scohe pa fortifica e control interno di Gobierno riba su propio maneho financiero. “ Minister Wever a bisa.
Na e momento aki ta trahando riba amplia e capacidad di CAD, pues percura pa CAD haya suficiente personal capacita pa por controla e jaarrekeningen di Pais Aruba, pero mirando e fluho di trabow actual y e capacidad di CAD ta importante pa CAD haya e e espacio yyudansa pa haci nan trabou y e acuerdo strategico di cooperacion ta contribui na esaki.
“Nos no por papia di responsabilidad sin accion concreto. E acuerdo cu SOAB ta un paso determinante pa eleva nos nivel di control interno y amplia nos capacidad y mi ta contento cu nos a jega na e momento aki, ” segun Minister Wever.
