E loke ta pasando den e holnan di Parlamento di Aruba no ta simplemente un debate politico; e ta un berguensa nacional. Ta un traspaso di nos dignidad como pais, caminda e mesun Presidente di Parlamento, cu mester ta e wardador di nos autonomia, awor ta actua como un vocero mal informa pa tapa e fracaso di e gobierno aki y entrega Aruba na Hulanda riba un plato di oro.
Mentira riba mentira: E farsa di LAft Ta un descaro total pa pretende cu nada a cambia. E Presidente di Parlamento ta gaña den cara di pueblo ora e bisa cu e Ley di LAft no a sufri cambionan structural. Na 2023 caba a ranca e confiansa ora a cambia e ley nacional ey. Pero e “monstro” cu nan kier introduci awor cu e Rijkswet ta hopi peor: e ta duna Hulanda e power pa dicta directamente sin envolvi Aruba, cu e capacidad di duna “aanwijzing” (instruccion) den un tempo record. E ora ey, nos no ta duna cuenta na nos mesun organonan mas, sino directamente na Den Haag.
Un Parlamento sin bos y sin voto E farsa di e “debate” ta bisto. Ora e ley ey yega mesa, e fecha ya ta fiha pa Hulanda y nos propio Gobierno. Parlamento di Aruba a wordo reduci na un simpel oficina di post cu ta manda un “verslag”, warda riba un contesta (NAV), y mira con Tweede Kamer ta dicidi nos destino. Peor ainda, e derecho di representa nos mes den e debate ey ta keda den man di un mayoria parlamentario cu por dicidi masha facil mes pa silencia nos delegadonan. Si e mayoria ey bisa “no”, e bos di Aruba no ta resona den Reino.
E fin di e derecho di amienda Loke e ley di 26 di augustus ta stipula ta e clabo final den e kist di nos autonomia: e ley nacional no por wordo cambia mas asina facil. E derecho sagrado di un parlamentario pa presenta amienda pa coregi un ley ta bira un pishi di holi. Sin e “conseho previo” ey, e parlamentario ta keda mara di man y pia.
Conclusion Usa e stoel di Presidencia pa malinforma pueblo pa asina proteha e interesnan di un gobierno cu kier sconde tras di Hulanda ta un acto di cobardia politico. Aruba merece berdad, no un teatro di mentira caminda e propio lidernan di cas ta esnan cu ta habri porta pa e asina yama “colonisacion moderno”. E berguensa aki lo keda marca den historia como e momento cu nos mesun hendenan a bende e futuro di e isla aki.