Ombudsman di Aruba, mr. sra. Jurima Bryson a participa den e International Ombudsman Institute (IOI) Board of Directors Meeting cu a tuma luga na Corsou for di 10 te cu 13 di mei 2026. Durante e reunion internacional aki, Ombudsmannan di diferente pais a reuni na Corsou pa discuti desaroyo actual, colaboracion y futuro di institutonan di Ombudsman na nivel mundial.
E bishita di trabou aki a cuminsa cu un reunion informal unda participante di diferente paisnan a haya oportunidad pa intercambia experiencia y fortalece contactonan internacional.
Durante e reunion oficial di IOI Board of Directors, diferente tema importante a wordo trata, incluyendo asunto financiero, colaboracion internacional, digitalisacion, uso di AI y fortalecemento di institutonan di Ombudsman mundialmente. Tambe ta tin votacion pa tuma decision tocante e puntonan cu a trata den e reunion.
Participacion den e reunion aki a duna Ombudsman di Aruba e oportunidad pa participa den discusionnan y decisionnan riba tarima internacional, intercambia experiencia y best practices, y representa e interesnan di pueblo di Aruba dentro di e red internacional di Ombudsman.
Sra. Bryson den su rol di Director Regional di IOI a participa tambe den e reunion di region di Caribe y Latino America. Durante e reunion aki, a papia, entre otro, tocante colaboracion regional, training, subsidionan y sosten pa institutonan di Ombudsman mas chikito den e region.
Sra. Bryson kier felicita Ombudsman di Corsou, sr. Keursly Concincion y su team pa un reunion internacional exitoso. E reunion internacional di IOI a trece informacion valioso tocante desaroyonan internacional y metodonan inovativo den e institutonan di Ombudsman, cu por contribui na fortalecemento di servicio y colaboracion den region.
Keda na altura di tur desaroyo
Bureau Ombudsman ta mantene comunidad informa via e siguiente canalnan di comunicacion:
Website: www.ombudsman.aw
Facebook: Ombudsman Aruba
Instagram: ombudsmanaruba
LinkedIn: Ombudsman Aruba