Den un ambiente caminda cu a biba pureza di nos cultura, Guci Dancers Aruba a hiba a cabo un evento grandi y exitoso, marcando e celebracion di nan di 21 aniversario. Durante e ocasion special aki, a corona un total di shete Rey y Reinan nobo, kendenan tin e responsabilidad di representa y preserva nos folklore, canto, baile y teatro na nos isla.
E anochi aki tabata carga cu emocion, orguyo y un despliegue cultural di halto nivel, presentando cancionnan, baile, y show di teatro caminda cada un tabata toca topiconan importante di nos isla cu nos no por lubida.
E Coronacionnan: Un Trayectoria di Evolucion
Director y organisado di Guci Dancers Aruba Rene Kock a splica con e seleccion y e categorianan a evoluciona den e transcurso di añanan:
“Esaki ta algo cu ta haci tur aña. E aña aki nos ta celebrando di 5 aña caba mandando Reina Cultural. Aña pasa e la cambia bira Reina Folklore dus e aña aki ta di dos aña di Folklore. Pesey e aña aki mi a corona mi Reinanan Cultural, pero tambe mi a corona mi Reinanan Folklore cu lo bay competi den Augustus akinan mes na Centro de Bario Brazil.”
Ademas de e reinanan cultural y di folklore, e anochi a conta cu coronacion di:
Reina di Carnaval: Incluyendo e categoria Infantil, Reina Grandi, y Señora Carnaval, kendenan tambe lo bay competi den e proximo Carnaval.
Rey di Cultura: Un titulo special cu a wordo entrega pa di dos aña consecutivo, e biaha aki na un total di shete diferente Rey y Reina, desde mucha te cu adulto, kendenan lo representa Guci Dancers y Aruba pa e aña 2026.
Preocupacion pa e Falta di Hubentud den Cultura
A pesar di e exito di e evento, e organisadonan a probecha e plataforma pa expresa un preocupacion profundo riba e falta di participacion di e hubentud den actividadnan cultural.
E meta di e coronacion nan aki no ta simplemente pa carga un corona of pa e “gara” (fama), sino pa rescata e balornan di nos Pais y stimula e amor pa nos tradicionnan. A wordo señala cu tin un scarsedad di hoben y mucha cu interes den nos folklore, locual ta bira un tema preocupante pa e futuro di nos identidad cultural. Si e situacion aki sigui asina, den dies aña nos folklore lo por sufri grandemente.
A traves di e titulonan aki, ta busca pa e reinan y reynan aki sirbi como un role model (ehemplo) pa otronan, asina hibando e mensahe cultural padilanti y inspirando e siguiente generacionnan.
Un Aña di Gran Promesa y Sorpresa
Guci Dancers a habri e aña aki super bon, mandando caba dos reina na cuminsamento di Januari: Señora Carnaval a sali Second Runner-up y e Reina Infantil a sali First Runner-up.
Pa e competencianan di Augustus awor, e organisado a adelanta cu tin hopi sorpresa na caminda:
“Nos Reinanan Folklore cu lo bay competi den Augustus ta fuerte. Tin cantantenan, hende di e mundo di beyesa, y hende cu tin experiencia y cultura den nan curason. Esey ta e cualidadnan cu mi ta busca.”
E anochi na centro di Bario Brazil a cera cu un sentimento di gratitud y orguyo enorme, reafirmando cu e meta principal di e esfuerso aki ta pa demostra e honor y e amor profundo cu tin pa e cultura y folklore di Aruba.
