Presidente di Parlamento di Curaçao, sr. Fergino Brownbill, ta na Merca den cuadro di e debut di e equipo nacional di futbol di Curaçao den Copa Mundial 2026.
Riba 18 di november 2025, nos equipo nacional di futbol a hunga su ultimo partido di cualificacion, caminda cu un empate contra e team di Jamaica riba teritorio jamaicano, a logra cualifica pa prome biaha den historia di Curaçao pa un Copa Mundial. Cu e logro inmenso aki, Curaçao mesora a bira e Nacion cu un poblacion mas chikito na mundo cu ta participa na Copa Mundial y e resto ta historia. A lanta un euforia total caminda nos comunidad tanto nacional como internacional ta sumamente orguyoso di ta “Yu di Curaçao” y nos tur por a mira kico e “Ola Blou” a baci y ta baciendo rond mundo. Den e cuadro aki Parlamento di Curaçao, como e organo democratico mas halto den nos pais cu ta basa riba un estado di derecho cu un democracia parlamentario, a tuma e decision preliminar (cu despues lo ser ratifica den un reunion di Parlamento) cu Presidente di Parlamento ta bai representa Parlamento y consecuentemente pueblo di Curaçao na e prome partidonan di grupo di nos equipo nacional di futbol cu ta tumando lugar na Merca.
Diadomingo, 14 di juni 2026, parti mainta prome cu e partido entre Curaçao y Alemania, tabatin e ceremonia caminda Curaçao a ricibi oficialmente e reconocemento, pa medio di un certificado di Guinness World Records, como e nacion mas chikito na mundo cu a cualifica pa Copa Mundial. E ceremonia aki a ser organisa pa CINEX conhuntamente cu Gobierno di Curaçao y a tuma lugar na Hotel Zaza na Houston. Presidente di Parlamento, sr. Fergino Brownbill, tabata presente aki hunto cu entre otro dignatario y mandatarionan manera Su Excelencia Gobernador di Curaçao, sr. Mauritsz de Kort, Prome Minister di Curaçao, sr. Gilmar Pisas, Harris County Judge di Texas, sra. Lina Hidalgo, Minister di Ensenansa, Ciencia, Cultura y Deporte, sr. Sithree van Heydoorn, Minister di Desaroio Economico, sr. Roderick Middelhof, Minister di Trafico, Transporte y Planificacion Urbano, sr. Charles Cooper, representante di Reino Hulandes, Consul General di Reino Hulandes na Miami, Estados Unidos, sra. Lisette Den Breems y Presidente di Federacion di Futbol Curaçao, sr. Gilbert Martina.
E mainta a cuminsa carga cu hopi emocion caminda por a scucha palabranan di bonbini, exito y aliento di parti sra. Lina Hidalgo y sigui pa discursonan di Minister Van Heydoorn y Prome Minister Pisas, kende a duna un speech historico. E liña cora di e discursonan tabata curashi, resilencia y soña grandi semper, cualnan ta reflexa bek den e bacho cu Curaçao a logra yega su prome Copa Mundial despues di un soño, vision y añanan di trabao duro y incansabel. Finalmente representante di Guinness World Records, sra. Hannah Ortman, a haci entrega di e certificado oficial na sr. Gilbert Martina, pa e nacion mas chikito na mundo cu a cualifica pa Copa Mundial di futbol.
12’or di merdia, ora local, tabata “E DIA” y “E MOMENTO” caminda e equipo di Curaçao mes a subi veld di bala na NRG Stadium Houston y haci historia pa semper. Curaçao tabata bon representa den stadion y nos hendenan a laga nan bos resona pa mundo mira con orguyoso y grandi na curason e pais aki ta. Finalmente e momento a yega cu nos bandera a habri grandi riba veld y nos himno a keda toca. Tur hende presente den e stadion y na cas a biba momentonan hopi emocional y di alegria pa nos Pais cu tanto nos ta stima. Nos equipo a lucha fuerte contra Alemania y apesar di e derota, nos a bolbe marca historia cu nos prome gol di mundial, anota pa Livano Comenencia, pa asina empata e partido contra di un ‘cuater biaha campion mundial’ y usando un di e miho porteronan actual na mundo, Manuel Neuer.
Parlamento di Curaçao ta sumamente orguyoso di nos equipo nacional di futbol y ta yama henter e team danki pa a saca cara di pais Curaçao en Grande. Nos a keda poni riba mapa mundial na un manera cu no por describi cu palabra y mesora haci un propaganda impagabel pa Curaçao. Presidente di Parlamento di Curaçao, sr. Fergino Brownbill, na nomber di Parlamento ta desea e equipo tur clase di exito y forsa den e partidonan benidero. Nos a gana CABAL!!
Presidente di Parlamento, sr. Fergino Brownbill, ta keda compaña durante di e viahe aki pa e griffier-substituto di Parlamento, sr. Gioke Maduro.
