BONHATA i KvK Bonaire ta diplomá promé grupo di empresario ku a risibí formashon di turismo
Jeanny Sint Jago, ganadó di BONHATA Tourism Business Academy Final Pitch dia 20 di yüni último, lo risibí USD 10.000 na sosten pa desaroyo di negoshi, pa asina e por lansa su eksperensia turístiko nokturno di opservashon di strea na Boneiru. Na Kámara di Komèrsio, Kralendijk, un hurado independiente a selektá su proyekto di entre sinku propuesta presentá pa seis graduado.
Anunsio di e ganadó a marka fin di e promé edishon di BONHATA Tourism Business Academy, un programa di entrepreneurship (empresariado) di shete siman, desaroyá pa Bonaire Hotel and Tourism Association (BONHATA) i Kamer van Koophandel (KvK) Bonaire. A lansa e programa akí ku e meta di oumentá e kantidat di negoshi den man lokal ku tin den Boneiru su sektor di turismo.
Kresementu di Boneiru su komunidat empresarial
Sektor di turismo na Boneiru ta sigui krese. Meta di BONHATA Tourism Business Academy ta di logra ku e kresementu akí ta krea oportunidat pa e empresarionan lokal i ku mas negoshi turístiko boneriano ta benefisiá di dje. E programa ta basá riba e formato di KvK Academy i un kuríkulo desaroyá pa Rijksdienst voor Ondernemend Nederland (RVO), miéntras ku BONHATA a adapt’é na e konteksto turístiko lokal. E ta ofresé empresario, tantu aspirante komo eksistente, konosementu i instrumento na un manera strukturá, pa nan por lansa negoshi viabel den turismo i yuda nan negoshi krese.
‘E meta ta práktiko i midibel,’ segun BONHATA. ‘Nos ke mira mas negoshi, produkto i miembro nobo bin forma parti di e sektor akí, i Tourism Academy ta e medio ku nos ta usa pa logra esei.’
Diesun módulo, shete siman, sinku konsepto
Durante e programa, ocho partisipante a kompletá diesun módulo prinsipal di formashon. Nan a siña definí nan grupo meta, diseñá balor di nan produkto pa e grupo ei, i tokante merkadeo i komunikashon, CRM, modelo di entrada, rekurso i kolaborashon klave, finansiamentu, impuesto i desaroyo di plan di negoshi. E seshonnan a ofresé tantu teoria komo tarea práktiko. Tambe, a invitá vários profeshonal di turismo i negoshi di Boneiru pa duna charla.
Seis di e partisipantenan a pasa pa e fase final di e presentashonnan di proyekto. Nan a presentá sinku konsepto individual di negoshi i unu desaroyá i presentá pa un duo. E hurado no a risibí ningun material di antemano; tur e proyektonan a keda presentá ‘live’ pa di promé biaha dia 20 di yüni, siguí pa un seshon di pregunta i kontesta.
E miembronan di hurado a evaluá kada presentashon (‘pitch’) a base di seis kriterio: inovashon, viabilidat, desaroyo di konsepto, relevansia pa sektor turístiko di Boneiru, klaridat di presentashon i abilidat di komunikashon. E panel a inkluí representante di KvK Bonaire, Tourism Corporation Bonaire, Grand Windsock Bonaire i Dive Friends Bonaire.
E konsepto ganadó
E idea sentral di Jeanny Sint Jago su propuesta ta di ofresé eksperensia di opservashon di strea na un manera strukturá. E tipo di turismo nokturno akí ta probechá di Boneiru su shelu di anochi, sin iluminashon artifisial, pa atraé un grupo kresiente di biahero ku ta interesá den eksperensia astronómiko. E hurado a skohe su proyekto komo esun mas fuerte a base di tur e kriterionan di evaluashon.
Sint Jago lo risibí USD 10.000 na sosten pa desaroyá su negoshi i hiba su proyekto te na lansamentu.
Despues ku e hurado a anunsiá e ganadó, tur seis partisipante a risibí nan sertifikado di finalisashon na un seremonia ku a tuma lugá na Delfins Beach Resort Event Center.
Rekonosementu
Un gradisimentu spesial ta bai na Grand Windsock Bonaire, patrosinadó prinsipal di BONHATA Tourism Business Academy. Nan sosten tabata esensial pa por hasi e programa, e presentashonnan final i e seremonia di sertifikashon posibel.
Tambe, BONHATA ke gradisí KvK Bonaire, su partner den e programa akí, pa nan kolaborashon den preparashon i ehekushon di e kuríkulo di ‘Akademia di Turismo’.
Por último, BONHATA ke gradisí e patrosinadónan Delfins Beach Resort, Dive Friends Bonaire i Epic Tours pa nan kontribushon na e promé edishon akí.
Tokante BONHATA
BONHATA ta e asosiashon di e sektor di proveedó di alohamentu i empresa turístiko na Boneiru. Su kompromiso ta ku desaroyo di turismo sostenibel, balansá i ku futuro na bista, ku atenshon pa ekonomia, naturalesa i habitabilidat.