Recientemente Organo Ehecutivo AZV hunto cu Fundacion ABO, HAVA (Asociacion di Dokter di Cas di Aruba) y Ministerio di Salubridad y Cuido di Adulto Mayor a tuma nota di un preocupacion cu ta biba bou di nos adultonan mayor tocante e testnan di sushi referiendo na e pensamento cu hende riba edad di 75 aña lo no tin derecho pa haci testnan di sushi. Como cu nos ta compronde e preocupacion, nos ta duna un aclaracion cu meta pa trece trankilidad bou di e aseguradonan di AZV y pa comunidad en general.
Seguro AZV a keda introduci principalmente pa cuido curativo. Conforme Ley AZV tur asegurado, no obstante di nan edad, por consulta nan sintomanan (kehonan) cu nan dokter di cas. Na momento cu dokter di cas constata cu ta medicamente necesario, ta sigui e liñanan di guia di Nederlandse HuisartsenGenootschap y tin posibilidad pa haci test di sushi. Den caso cu ta necesario, e dokter di cas lo referi e pashent pa un specialista. Esaki ta e procedura normal; valido pa tur asegurado y no obstante edad.
Sin embargo, den e mesun Ley AZV tin e posibilidad pa Organo Ehecutivo AZV cubri loke ta yama cuido preventivo di 2do of 3er grado, semper y cuando e programa pa deteccion di poblacion ta uno scientificamente comproba. Den cuadro di deteccion tempran di cancer, Organo Ehecutivo AZV hunto cu Fundacion ABO tin, desde 2025, un programa pa poblacion di deteccion di cancer di tripa (CORESA) cu ta disponibel pa e grupo di hende di 45 te cu 75 aña. E grupo meta (esta hende di 45 te cu 75 aña) a wordo determina cuidadosamente y ta basa riba recomendacionnan internacional, ampliamente argumenta y cu envolvimento di profesionalnan di sector medico local y internacional, cu a premira cu e benificionan ta surpasa e desbentahanan. E testnan di laboratorio di e programa di deteccion di cancer di tripa (CORESA) aki ta wordo considera “e prome paso” y por resulta den diferente otro testnan avanza pa haya sa si hende tin cancer di tripa of no.
Loke ta importante pa compronde, ta cu un programa pa poblacion di deteccion tempran di cancer semper ta basa riba un grupo di edad specifico (grupo meta) y tin su propio proceso. Sinembargo, esey no ta nifica cu un hende cu ta pafo di e grupo meta no por wordo yuda. E hende pafo di e grupo meta ta acudi semper na su dokter di cas.
Organo Ehecutivo AZV hunto cu Fundacion ABO, HAVA (Asociacion di Dokter di Cas di Aruba) y Ministerio di Salubridad Publico y Cuido di Adulto Mayor ta sigui traha duro hunto pa optimalisa cuido medico pa tur asegurado di AZV.
Pa mas informacion tocante e programanan pa poblacion di deteccion di cancer di pecho (BOB), cancer na boca di matriz (BOCA) of cancer di tripa (CORESA)
→ por comunica cu Fundacion ABO na 5881212.
Pa mas informacion paso persona tin sintoma pero no ta cay den e grupo meta di e programa di deteccion di cancer di tripa (sea ta mas jong cu 45 aña of ta mas grandi cu 75 aña) → por comunica cu dokter di cas. o Pa mas informacion tocante seguro AZV → por comunica cu AZV na 5279900.