Ki ora si y ki ora no?
E discusion actual no ta riba con un minister ta gasta su salario priva. E punto ta otro: esaki tabata un biahe di trabou oficial aproba pa Conseho di Minister. Y p’esey tin un deber di transparencia.
Loke ta haci e asunto ainda mas relevante ta cu nos tin awo e confirmacion for di e ministerio mes. Den un e-mail di 19 di november 2025 e Chief of Staff di e ministerio a confirma oficialmente cu e minister a sali “awe”, esey tawata 19 di november 2025”, pa Corsou den funcion oficial. E e-mail ta bisa literalmente:
“Zoals zojuist telefonisch besproken, bevestig ik hierbij per e-mail dat de dienstreis van Minister Croes naar Curaçao, oorspronkelijk gepland van 20 t/m 22 november, met één dag is vervroegd. Minister Croes zal reeds vandaag afreizen naar Curaçao.”
Esey ta e propio ministerio cu ta confirma: esaki tabata un dienstreis, un biahe di trabou oficial. No un biahe priva manera e minister kier insinua. Su biahe pa Corsou, inicialmente planea pa 20 di november 2025 cu avion comercial, a wordo hala 1 dia mas trempan. Pues e minister a haci un biahe oficial riba 19 di november 2025 den un jet priva.
Sinembargo loke a confundi pueblo ta cu splicacion di e minister mes a cambia diferente biaha. Prome, minister tabata papia di un “lift.” Despues e minister a bisa cu el a paga e vuelo completo for di su mesun saco. Despues minister a insinua cu a “share cost.” Awor recientemente minister a bisa publicamente cu ta un landing fee di menos di Afl. 1.000 el a paga. Dus for di un “lift”, pa paga e vuelo completo, pa comparti gasto y pa paga solamente un landing fee no ta mescos. Cada un di esakinan ta un construccion financiero diferente y nan tur no por ta berdad na e mesun momento.
Un landing fee ademas no ta e costo total di un jet priva. Combustibel, crew, handling, costo operacional: ken si a paga esakinan? Si e minister a paga solamente e landing fee, kende a paga e resto di e costonan di un jet priva registra na Merca sin certificacion AOC?
Articulo III.17 di e Staatsregeling ta duna cada parlamentario e derecho di haci pregunta na ministernan. Definitivamente nos no ta papiando di Parlamento cu kier biba bida priva di e minister. Parlamento ta controla un biahe oficial, confirma pa e propio Chief of Staff di e ministerio, cu a wordo haci riba un avion sin certificacion legal. Esey ta control parlamentario. No persecucion politico.
E Bezwaaradviescommissie LAR a confirma den su conseho tambe: e minister tin e obligacion legal pa duna e informacion cu a wordo pidi. E comision a declara e bezwaar cu MEP a entrega GEGROND y a ordena e minister mester pa cumpli cu su deber di transparencia.
Cinco pregunta por caba e discusion hopi rapido:
Ken a ofrece of organisa e biahe den jet priva sin AOC pa e dienstreis oficial?
Kico tabata e costo total di e vuelo?
Cuanto exactamente e minister a paga personalmente?
Na ken e pago a wordo haci y tin documentacion verificabel di esey?
Ken a paga e resto di e costonan cu e landing fee no ta cubri?