Gobierno di Aruba a firma un acuerdo di consultancy pa e versterking, innovacion y digitalisacion di e sector di salud mental y cuido di adiccion na Aruba. E contrato, cu tin un maximo di Afl. 194.400,- bruto, a keda otorga directamente na e profesional Hulandes Koen Aanen sin un destaho publico. E decision aki a lanta discusion relaciona cu e tarifanan, e schedule di trabou y e argumentacion cu no tin profesional local disponibel.
Segun e Ministerial Beschikking di dia 15 di september 2026, firmá pa e Minister di Transporte, Integridad, Naturaleza y Cuido di Adulto Mayor (encarga tambe cu Salud Publico, Asunto Social y Cuido di Adiccion), e consultor lo traha a base di un tarifa di Afl. 270,- pa ora. E compromiso aki ta pa un maximo di 20 ora pa siman lo cual ta ekivalente na trabou di mitar dia cu un limite di 720 ora durante e periodo di 15 di september 2026 te cu 31 di mei 2027. Esaki ta nifica cu e compensacion por yega te na un averahe di alrededor di 23 mil florin pa luna.
E trabou di e consultor lo enfoca riba analisa e problematicanan existente, desaroya y priorisa medidanan di mehoracion, y duna conseho riba innovacion, digitalisacion y cooperacion den e cadenanan di cuido. Pa realisa e analisa aki, e consultor lo mester recopila e informacion y datos directamente for di e instancianan di cuido di Aruba mes (zorginstellingen), e Directie Volksgezondheid y e ministerio. E obhetivo final ta pa presenta un plan di implementacion den faseda.
E costonan di e opdracht aki lo keda parti den dos mita igual entre:
• Bureau di Minister di Salud Publico, Asunto Social, Cuido di Adulto Mayor y Adiccion (post di costo 16560001.4361)
• Directie Volksgezondheid (post di costo 16561001.4361)
Excepcion di Ley di Anbesteding
E costo total di e contrato ta cay den e categoria cu normalmente ta rekeri un destaho onderhands (onderhandse aanbesteding). Sinembargo, Gobierno a haci uzo di e excepcion den Articulo 16, prome piso, sub b di e Aanbestedingsverordening pa otorga e trabou aki directamente (uit de hand).
Como ubicacion pa e excepcion aki, e decreto ta menciona cu e tarea aki ta rekeri un conocemento y experiencia specifico den transformacion digital y maneho di cuido cu actualmente no ta presente of disponibel den e aparato gubernamental di Aruba. Segun e argumentacion oficial, e consultor Aanen ta conta cu experiencia amplio como programmamanager di Transformatie Digital na e institucion Arkin/Jellinek na Hulanda.
Falta di responsabilidad y inprofesionalismo
Banda di esaki, ta resalta e inprofesionalismo cu e Gobierno di AVP – FUTURO ta traha, unda cu e carteranan di e ministernan ta meng deen otro debi cu e Landsverordening Inrichting Ministeries (LIM) no a pasa ainda den Parlamento. Pa via di e situacion aki, ningun minister ta para debidamente responsabel pa e fechorianan y decisionnan aki cu ta keda tuma den e maneho di e pais.
