Ex Ministro Plenipotenciario Ady Thijsen a reflexiona riba su periodo den Hulanda y a expresa preocupacion profundo riba e direccion actual di relacionnan di Reino y e ausencia prolonga di un Ministro Plenipotenciario pa Aruba.
Segun Thijsen, durante su mandato como Ministro Plenipotenciario a wordo haci hopi trabou den direccion positivo pa fortalece posicion di Aruba na Hulanda. E a indica cu su gestion tabata basa riba e cinco pilarnan cu MEP a traha riba dje durante añanan: visibilidad, cooperacion, respeto mutuo, representacion efectivo y defensa di interesnan di Aruba den Reino Hulandes.
Thijsen a enfatisa cu, segun su vision, Aruba mester ta claramente visible no solamente na Hulanda, sino tambe den Union Europeo y den henter Reino Hulandes. “Nos mester por compronde otro y coopera cu otro, y no hunga poder riba otro, paso na final nos ta biba hunto den Reino Hulandes,” e a subraya.
E a señala cu informacion over di Aruba mester yega tur caminda den Hulanda , no solamente na nivel nacional, sino tambe den gemeentenan, provinciënan, hogeschoolnan y universidadnan pa cu tur hende por compronde kico ta e status di Aruba y su papel den Reino Hulandes.
Sinembargo, Thijsen a lamenta cu hopi di e trabounan cu a wordo inicia awor ta cayendo atras. Segun Thijsen, e causa principal ta e actuacion di actual Minister di Relacionnan di Reino, Gerlien Croes, cu den su palabra ta traha “irresponsablemente y contra di constitucion” door di no nombra un Ministro Plenipotenciario. Ademas, a manda director di Aruba huis cas , algo cu hopi ta catalogisa “un persecucion politico”.
Thijsen a plantea preguntanan critico cu, segun dje, te ainda no tin contesta:
- Ken ta responsable pa e daño institucional cu ta wordo causa?
- Pa kiko e Minister ta traha di forma cu por debilita posicion di Aruba den Reino Hulandes?
Tambe e a referi na situacion politico den Hulanda, cu recientemente a enfrenta eleccionnan sin un gabinete mayoritario cla. Segun Thijsen, Hulanda ta den un fase politico dificil, y e dinamica aki tin impacto directo riba Caribe Hulandes y Aruba.
E a menciona especificamente e Staatsecretaris nobo di Koninkrijksrelaties , cu e a traha cu ne anteriormente, y a indica cu e ta “hopi curioso” pa mira con Hulanda lo mira futuro di Caribe den Reino.
Un punto central di su critica ta cu Aruba actualmente no tin representacion oficial na Hulanda ni na Union Europeo. “Na momento cu Aruba no tin un Ministro Plenipotenciario, Aruba simplemente no tin un voz na Hulanda,” e a afirma, calificando e situacion como lamentabel y dañino pa interesnan di pais.
Segun Thijsen, e responsabilidad ta riba actual gobierno AVP–FUTURO, cu te ainda no a nombra un Ministro Plenipotenciario, casi un aña despues di inicia su mandato. E a yama e situacion “un perjuicio directo pa Aruba” y a insisti cu proximo gobierno mester tuma su responsabilidad serio y asegura representacion digno pa Aruba den Reino Hulandes.
E a conclui cu un Ministro Plenipotenciario no ta un luho politico, sino un instrumento esencial pa defensa di interesnan di Aruba na Hulanda y EU.