Despues di e di dos wega cu e delegacion di damas a hunga na Republica Dominicana , cual tabata contra di Barbados, a nota un tremendo prestacion di Aisse Gumbs, un di e resfuerso di Hulanda. Aisse a cuminsa prome tempo di wega den mediocampo y despues a ser apunta den parti ofensivo.
Den tur area e la sa di destaca hungando tremendo futbol, sin kita afo tremendo assist pa asina Vanessa Susanna completa e hugada den e net di Barbados.
Aisse a nace na Aruba y na aña 2001 a muda bai Hulanda hunto cu su famia.
Assie a cuminsa hunga straatfutbol na edad di 8 aña hunto cu amistades y su ruman homber. Asina su amor pa e deporte a cuminsa, y cu su 18 aña Assie a cuminsa hunga cu un Club GVAV den cuidad di Groningen. Despues di algun tempo e a haña oportunidad pa hunga den hoofdklasse di Oranje Nassau.
Desde July 2021, Aisse ta hungando cu Sparta Rotterdam.
Aisse ta expresa di ta agradecido di por a haya oportunidad pa representa Aruba y pe sigur ta un orguyo pa por a forma parti di seleccion di damas pa prome bes.
