Recientemente Arubaanse Voetbal Bond (AVB) a confirma su participacion den e weganan eliminatorio di Campeonato Mundial di Futbol Qatar 2022, cu ta tuma luga na Tampa, USA. A prepara un ekipo nacional, cu e mihonan di nos isla den futbol.
Lamentablemente, net prome cu biaha pa Merca pa enfrenta Surnam, a presenta e realidad cu 2 hungado a test positivo pa Covid-19.
Consecuentemente, a haci test cu tur otro hungado, pa garantisa cu tur otro ta test negativo pa por biaha. Hunto cu DVG a sigura cu tur hungado a haci test pa por biaha sin problema y representa cara di Aruba internacionalmente. Tur otro hungado, den e seleccion nacional, a test caba y tur ta negativo.
Mester menciona cu e entrenado a percura pa simannan largo di training intensivo. Meta tabata pa alcansa un nivel di calidad di hungadonan, pa por enfrenta Surnam. E schedule di entrenamiento a bay segun reglanan estricto di DVG.
Mester menciona cu e medidanan di prevencion pa evita plamamento di e virus na Aruba a compromete e programa di entrenamiento bastante, pero asina mes e hungadonan a duna tur di nan banda pa sigui entrena, pa por ta den top condicion pa enfrenta e Surnameonan dentro di poco.
AVB ta convenci cu e esfuerso y dedicacion di tur e hungadonan y e staff tecnico lo duna bon resultado den e wega cu ta tuma luga na Bradenton, Sarasota, na Merca.