Camacuri Harley-Davidson Club ta invita henter comunidad di Aruba pa participa den un fin di siman di entretenimiento, musica y actividadnan di motocicleta na Entertainment Center na Dakota. E evento lo reuni bikers di Aruba, Boneiro y Corsou pa celebra hunto un programa yen di ambiente y camaraderia.
Awe nochi, diabierna 13 di maart, lo tin un ambiente special denomina “Tsunami”, unda e publico general ta bonbini pa bin disfruta di musica, baile y un atmosfera unico hunto cu e bikersnan di e tres islanan.
E celebracionnan lo sigui durante henter fin di siman. Diadomingo ta programa un ride rond di Aruba, unda e grupo di motociclistanan lo haci un recorido rond di isla. E paseo lo termina na Entertainment Center na Dakota, unda e ambiente festivo lo continua cu musica y entretenimiento pa tur presente.
E serie di actividadnan lo sigui durante e siman te cu 18 di maart, dia di e gran careda rond di Aruba, cual ta parti di e celebracion pa Dia di Himno y Bandera di Aruba.
Presidente di Camacuri Harley-Davidson Club, conoci como “Buchi”, ta invita henter pueblo di Aruba pa bin celebra hunto cu bikers di Aruba, Corsou y Boneiro. E evento ta un oportunidad pa comparti cultura di motociclismo y pasa un rato agradabel hunto.
Entrada pa e evento ta gratis, solamente cu un sonrisa.
