Mientras cu varios politico na Corsou cu ta bou investigacion a opta pa entrega nan carta di retiro pa preserva e integridad di e proceso, na Aruba e contraste ta mas cu claro. A pesar di dudanan serio cu ta circula riba su actuacion, minister Gerlien Croes ta keda den su funcion, creando preocupacion riba e standard di responsabilidad politico den Reino.
Na Corsou, ministro plenipotenciario Carlson Manuel a entrega su carta di retiro despues cu a wordo anuncia cu e ta bou di investigacion. Segun prome ministro di Corsou, Gilmar “Pik” Pisas, e decision aki a wordo tuma pa duna espacio pa un investigacion independiente, despues cu acusacionnan serio a wordo presenta tanto riba medionan social como via un mocion di Parlamento, cu a solicita na Controlaria General pa evalua e caso di “Kas Kòrsou” na Hulanda.
Pisas a enfatisa cu e retiro no ta un huicio, pero un medida di transparencia y responsabilidad. Segun pisas, desde 2020 su partido MFK a implementa un politica interno unda transparencia, disciplina y respet ta central, y e caso di Manuel ta un prueba di e principio aki.
Tambe minister di Bestuur, Planning y Dienstverlening (BPD) Kimberly Lew-Jen-Tai a entrega su carta di retiro, aunke den e caso aki gobierno di Corsou a indica cu tabata pa rason personal. No obstante, e imagen general ta un di liderazgo cu ta actua proactivamente ora tin cuestionnan riba integridad.
E manera di actua na Corsou ta forma un contraste fuerte cu loke ta pasando na Aruba. Den e isla, Minister Gerlien Croes ta keda na su puesto a pesar di acusacionnan y duda publico riba su funcion y actuacion den un jet priva cu ta indica fuertemente cu e la ricibi regaldo cual cu la ley no por. Criticanan ta bisa cu e ausencia y di no contesta e preguntanan cu parlamento a haci ta lanta hopi mas sospecho y cu por trece consecuencia politico serio pa Minister Gerlien Croes y na unda cu ta mina e confianza di ciudadano nan na Aruba riba gobierno AVP-FUTURO.
Observadornan politico ta indica cu e situacion no ta solamente limita na un minister Gerlien Croes. Tambe otro minister di partido FUTURO, Geoffrey Wever, ta wordo menciona posiblemente en relacion cu actuacionnan cu ta lanta hopi pregunta y sospecho, loke segun analistanan ta señala un problema mas amplio di sistema di goberna tras di cortina cu ta birando un postema na Aruba.
E responsabilidad final, segun e criticanan, ta keda tambe cu Primer Ministro Mike Eman, cu como hefe di gobierno tin e deber di interveni y garantisa cu normanan di bon gobierno y integridad no ta wordo ignora.
E mensahe for di Corsou ta claro: ora tin duda riba integridad, paso atras por proteha e institucion. Aruba, segun varios analistanan, por beneficia di aplica e mesun principio. Aunke cu e gobierno actual di AVP –FUTURO desde un principio no a pone e cartera di integridad como principio pa un bon gobernacion.