Amber van Veghel a obtene su doctorado (PhD) na Universidad di Aruba y KU Leuven (Belgica). El a realisa investigacion riba un tema cu ta toca bida diario riba e islanan directamente: cuminda. Den su investigacion multidisciplinario, el a analisa tanto e impacto ambiental di importacion di cuminda como a traha un resumen sistematico di investigacionnan riba cuminda na e islanan ABC.
E tema aki ta relevante pasobra consumo di cuminda ta causa te cu un di tres parti di e emision mundial di $CO_2$ y pesey ta contribui na cambio di clima. Van Veghel a mira e cadena completo – for di produccion te cu yegada na e islanan – y a calcula den detaye e emision di $CO_2$ di transporte aereo via avionnan di pasahero cu ta bula for di Hulanda pa Aruba. E enfoke integral aki ta haci su investigacion innovativo tanto pa e islanan como pa e mundo academico.
Ora nos mira e “cuadro completo”, nos por reduci e emision di $CO_2$ di nos consumo di cuminda door di evita productonan cu ta bin via avion, carni y producto di lechi (especialmente carni di baka), y productonan pa cua a bota mondi, manera cierto productonan di chuculati pero tambe carni di baka for di Sur America. Na mes momento, tin oportunidad pa reduci e impacto aki, por ehempel door di scoge galiña mas biaha en bes di carni di baka, of door di come mas a base di mata (plantaardig).
“Precisamente pasobra nos ta asina dependiente di importacion, e escogencianan den loke nos ta come – door di tanto habitante como bishitante – ta haci un gran diferencia,” segun Dr. Van Veghel.
Ademas, Van Veghel tabata e prome pa mapa sistematicamente e investigacionnan existente riba cuminda na e islanan ABC, basa riba analisinan di nuebe database local e internacional. Esaki ta mustra cu e cantidad di estudio a crece fuertemente den e ultimo dies añanan y cu e temanan ta amplio: for di patronchi di come y coleccion di awa di awasero pa agricultura, te cu e desafionan y oportunidadnan pa mas produccion local di cuminda.
Van Veghel a cuminsa su trayecto di doctorado na 2020 na KU Leuven, den colaboracion cu Universidad di Aruba den cuadro di e programa SISSTEM. E ta e di dos studiante di isla cu ta promove den e programa aki. Su promocion tabata bou di guia di promotor prof. Annemie Geeraerd Ameryckx (KU Leuven) y co-promotornan prof. Salys Sultan (Universidad di Aruba) y dr. Renske Pin (RE-Quest). Entre 2020 y 2024 el a biba y traha na Aruba, caminda el a duna les tambe. Actualmente el a regresa Curaçao, caminda e ta continua su trabou riba tereno di cuminda y sostenibilidad via su propio practica di investigacion y conseho, TCR.
A clausura e defensa di tesis cu un ovacion formal. Despues a ofrece su tesis na Gobernador di Aruba. E tesis ta disponibel gratis digitalmente y por fia esaki via e bibliotecanan di Universidad di Aruba y Biblioteca Nacional Aruba. Pronto e lo ta disponibel tambe na Boneiro y Curaçao.
Personanan interesa por explora e investigacion mas leu durante presentacionnan dia 11 di mei na University of Curaçao y dia 17 di juni durante e Dutch Caribbean Research Week na Universidad di Aruba.
