Maske con liher e mentira por ta, e berdad lo alcanse. Esaki ta conta pa entre otro minister Arends cu apesar di a comete tantisimo blunder, no a tene honor na su mes y retira pero a prefera di keda sinta den e stoel comfortabel den cocolishi. Otro mentira ta e forma cu e gobierno kier bnede pueblo un 6 pa un 9. Nos por a lesa e relato di nos minister di finansa riba nos debe nacional. Nos sa cu e aña aki tin 2 debe di mas o menos 560 miyon florin ta madura y lo mester bay pag’e of gobierno lo tin cu refinancia e suma. Gobierno ta gaba di tin un surplus di 35 miyon florin pa aña 2023 cual no a termina ainda. Gobierno ta usa differente cifras cu ta varia entre 40 pa 70 miyon florin cu e BBO na frontera lo trese den caha di gobierno pa 2024. Gobierno a saca 2 bonds na valor di 320 miyon florin tras di otro. E suma ta di 165 miyon pa 9 aña cual ta caduca na 3032 na un interes di 6.5% y e otro ta 160 miyon pa 13 aña cual ta caduca na 3036 y tambe na un interes di 6.5%.
Na aña 2020 fuera di a fia 920 miyon for di Hulanda, gobierno a fia riba Mercado international e suma di 630 miyon florin. Nos gobierno ta sigur sigur campion mundial di mundo den fia placa. E gobierno a fia den un aña1.5 biyon florin na aña 2020. Na final di 2022 Aruba su debe tabata rond di 5.720 biyon florin. No ta un secreto publico cu gobierno no tin mayoria den Parlamento y ta dificil pa conbense oposicion pa para banda di coalicion. Kizas gobierno ta kere di por bisti su piyama den dia y trata di soña, pasobra kier pinta tur cos bunita manera cu nan ta haya un 10 pa nan gobernacion.
Masha hopi tempo caba un pueblo cu a wordo suta pa medida pa un gobierno cu ta number uno den manipula, a perde tur confiansa di nos pueblo. Pueblo su wowo a habri manera tur otro pueblonan rond di mundo cu ta wordo goberna pa un gobierno socialista/comunista. Gobierno mester ta hopi contento cu e ley di BBO na frontera no a pasa na juli, paso si ta asina pueblo lo a core nan na mal ordo for cocolishi. Un gobierno cu ta goberna cu medida ta suta pueblo cu ya no por mas. Comunistanan ta kere cu un pueblo cu stoma bashi ta keda cu e mentalidad socialista. Soñar no cuesta nada.
Ni maske con nos Parlamentarionan kier gaba cu e gobierno aki ta goberna bon, pueblo ya no tin confiansa mas den e gobierno aki. Pueblo di Aruba no por ta orguyoso di un gobierno cu durante campaña a gaña pueblo di conoce e materia y cu lo goberna sin medida. E partido cu a causa e mega debe aki tin nomber y faam cual ta partido mep. Partido mep a bende Aruba su Status Aparte barata pa un debe di 4 biyon florin y nan a hasi pais Aruba catibo di debe. Hendenan studia sin principio a zink Aruba. E abundancia cu a caha di gobierno a ricibi ultimo 22 aña a desaparese y a wordo remplasa pa medida. No tin placa jega e goberno aki. Un gobierno sin Dios ta un gobierno inhusto. Esaki nos ta bibando. Pa tin un cambio real nos tin mester di pone Dios den nos gobernacion. Solamente cu ayudo di nos Tata Todopoderoso nos lo por sali pa dilanti y tur e partidonan politico cu ta bay contra leynan di Dios lo no trese ningun solucion pa nos pueblo. Partido Curpa ta e alternative paso principio di Dios no ta negociabel.
Comunicado Eric Ras Lider di Partido Curpa
1 comment
[…] Source link […]