Ministerio Publico ta suplica tur viahero pa paga debe di boet na tempo. Personanan cu boet habri por wordo para na frontera te cu nan paga e suma cu nan debe.
Na momento cu un persona pasa den control na airport, e funcionario por wak den computer cu e tin un señal poni bandi su nomber, loke ta indica cu e debe boet. Den es caso, e persona lo wordo para y por sigui unicamente despues cu el a paga su debe. Esaki por tin como consecuencia cu e ta perde su vuelo, cu e ta haye inesperadamente den gasto of cu su presupuesto di vakantie ta keda afecta… sin papia mes di e stress y desilusion cu e situacion aki lo causa.
Ministerio Publico ta conseha viaheronan pa controla di antemano prome cu nan viahe si nan tin debe di boet y pa bin paga. Si bo persona no ta sigur sigur, por manda un email na info@omaruba.aw. No lubida pa menciona e nomber completo.
Ciudadanonan por paga na caha di Ministerio Publico. No tin necesidad pa haci cita: yega. Ministerio Publico ta habri dialuna, diamars, diaranson y diahuebs di 8.00 pa 11.30 di mainta y di 1.00 pa 3.30 di atardi. Cu excepcion di diabierna, pasobra diabierna Ministerio Publico ta habri mainta so. Por paga cash y online (via cuenta bancario 4000905 na Arubabank).
Ministerio Publico ta desea tur hende un felis vakantie.