James Finies ta anuncia na pueblo di Boneiru cu, den reconocemento di e abolicion di sclavitud na 1863 den e islanan Antiyano coloniza di Caribe, e Bonaire Draft Resolution, cu ta patrocina pa dos pais Caribense di CARICOM, riba 10 di juni 2026 a wordo formalmente soti y registra den e proceso administrativo di e di 80 Asamblea General di Nacionnan Uni pa wordo atende.
Desde 1955, ora Hulanda a kita Boneiru y e anterior islanan di Antiyas Hulandes for di e lista di Teritorionan Sin Propio Gobernacion (NSGT) di Nacionnan Uni, esaki ta e paso constitucional mas significante cu a wordo tuma tocante e islanan Hulandes coloniza den Caribe.
E Bonaire Draft Resolution cu a drenta e proceso pa wordo atende den e di 80 Asamblea General aki ta urgi pa reconoce cu Boneiru ta sigui siendo un Teritorio Sin Propio Gobernacion segun e Charta di Nacionnan Uni. El a declara cu tin un obligacion, bou di Articulo 73 di e Charta, pa Reino Hulandes, como e Poder Administrativo di e Teritorio di Boneiru, pa transmiti informacion tocante Boneiru. Tambe e ta pidi e Comite Special di Decolonizacion pa considera e “Cuestion di Boneiru” den su proximo sesion y pa raporta riba dje na Asamblea General den su di ochenta y un sesion. E propuesta a wordo registra den sistema pa e Secretario di Asamblea General di Nacionnan Uni pa mundo completo, incluyendo e 192 Pais Miembronan di Nacionnan Uni, por haya acceso na dje pa medio di e sistema e-Delegate.
Kico esaki ta nifica pa Boneiru?
Ta structuralmente riba e lista aki ta nifica cu Hulanda lo mester duna cuenta y raporta na Asamblea General di Nacionnan Uni tocante e desaroyo social, economico, cultural, politico y educativo di e pueblo nativo Boneriano, de acuerdo cu e Charta di Nacionnan Uni y e tratadonan cu Hulanda a acepta y firma na 1945. Esaki a sosode solamente tres biaha den historia di mundo: na New Caledonia na 1986, French Polynesia na 2013, y awor, pa prome biaha den e parti aki di mundo, cu Boneiru na juni 2026.
Con esaki a sosode?
2003 – 2010: James Finies a halsa su voz publicamente y a opone su mes contra e direccion divisivo y polarisante cu politiconan di Boneiru y di Antiyas Hulandes tabata bayendo.
2010 – 2016: Finies a bandona su carera y bida como bankero comercial y a bira un defensor voluntario di derechonan humano full-time na Boneiru y den henter Antiyas, luchando pa un referendum y e derecho riba autodeterminacion.
2016 – 2026: Despues cu no a respeta e resultado di e referendum di Boneiru di 2015, Finies a cuminsa un trayectoria internacional di concientisacion continuo y misionnan di lobby den Caribe, Centro y Latinoamerica, Europa, y Nacionnan Uni na Ginebra y New York, luchando pa e re-inscripcion di Boneiru bou di proteccion di Nacionnan Uni.
E grupo di defensa di derechonan lidera pa Sr. Finies ta e unico organizacion di sociedad civil cu, di manera consecuente y continuo desde 2003 te awe na 2026, a traha pa mustra y husto e necesidad pa e comunidad internacional interveni na Boneiru y den e islanan di Caribe Hulandes.
Dicon Boneiru?
E pueblo di Boneiru a keda sin proteccion y abandona pa e islanan “CAS” ora cu Corsou, Aruba y Sint Maarten, huntu cu Hulanda, despues di e disolucion di Antia Hulandes na 2010, di manera unilateral a saca Boneiru for di bao di proteccion di e Statuut. Pueblo di Boneiru a wordo incorpora, contra nan deseo y sin nan consentimiento, den Constitucion di Hulanda, subordina y poni bou di merced di un gobierno externo for di Den Haag.
Diferente for di Corsou, Aruba, Sint Maarten, Saba y Sint Eustatius, e situacion di Boneiru a desaroya desde e momento ey pa awor den un crisis humanitario grandi y silencioso. Boneiru ta den un situashon hopi critico, enfrentando un eliminacion demografico y cultural inmediato. E Bonerianonan nativo, cu segun cifranan di CBS tabata representa mas cu 70% di e poblacion prome cu 2010, a wordo reduci sistematicamente pa medio di maneho institucionaliza pa menos cu 30% awe. Prediccionnan ta indica cu den menos cu dies aña, pa 2035, nan lo representa menos cu 15% di e poblacion. Afortunadamente, Boneiru tin un diaspora grandi den Reino Hulandes. Aun asina, e Bonerianonan ta enfrentando e peliger di desaparece na Boneiru den e proximo decadanan si mundo y e comunidad internacional no interveni pa proteha e pueblo Boneriano.