E artíkulonan di René Zwart tur ora tin algu ku por ta mas òf ménos bèrdat den nan. Su artíkulonan semper ta haña apresio, pa motibu ku nan ta mishi ku partinan ku ta sensibel pa hende, sabiendo ku hopi biaha ta terseranan a dun’é informashon. Esaki no ta un problema, pasobra un periodista no por vigilá tur kos su so, lesa tur dokumentu i riba dje skirbi e mes tambe. Un di su artíkulonan di mas resien tin komo título: ‘Ketuketu Konseho Insular di Boneiru a regalá su mes mei mion’. Sin bai hiba un diskushon den medionan di komunikashon, mester mustra si riba e echo ku tantu e título komo e kontenido no ta kuadra ku e bèrdat korekto i kompleto.
Pa kuminsá ku e palabra ‘ketuketu’ ku innesesariamente ta insinuativo. Den e frase inisial di e di dos alinea e promé 10 palabranan ta: ‘Den reunion públiko di 3 di òktober a aprobá e ordenanza 2023’ Kon e ke mèn ketu ketu? Si niun hende no a dediká niun palabra na esaki durante e reunion di Konseho Insular no ta al kaso, pa motibu ku tur miembro di Konseho Insular mester a lesa tur dokumentu i no ta nesesario pa debatí tokante kada dokumentu, mirando ku ya kaba anteriormente a trata tur dokumentu ampliamente den un òf mas reunion di komishon. Òf akí ya kaba e eskritor (òf eskritornan) ta duna un apertura pa sobrá di e alegato? Djis pa bini ku un argumento numa!
E eskritor ta hasi komparashon ku e munisipionan Putten i Haarlemmermeer. E ta hasi esaki a base di e tamaño di poblashon i si tin un aeropuerto internashonal òf nò. Ku esaki e eskritor no ta tene kuenta ku e nuansanan nesesario. Ta bèrdat ku e miembronan di konseho munisipal na Hulanda ta haña un kompensashon a base di e kantidat di habitante. Loke e eskritor ta keda sin menshoná ta ku tin no ménos ku 19 miembro di konseho munisipal na Putten. E eskritor ta lubidá di menshoná tambe ku e aparato (di sosten) ku e miembronan di Putten por konta kuné ta hopi biaha mas grandi ku na Boneiru (i e islanan BES). Kada bes tòg ta entre otro Cft i sekretario di estado di Asuntunan Interno i Relashonnan den Reino ku ta raportá i mustra riba e forsa/kapasidat di ehekushon na Boneiru. E eskritor a yega di puntra su mes kuantu empleado públiko de fakto na Hulanda ta okupando nan mes ku e munisipio Putten? E eskritor a yega di puntra su mes kuantu empleado públiko den diferente entidat ta sostené e miembronan di konseho munisipal direktamente òf indirektamente? Na momentu ku un miembro di e konseho munisipal di Putten djis indiká ku e no por duna un konseho korekto òf kompleto òf no por yega na un (toma di) di desishon sólido, mesora nan ta habri un bleki di empleado públiko i hasi uso di departamentonan pa yena e bashí akí. Niun hende no tin un bista riba e kantidat total di empleado públiko i forsanan eksterno, i e gastunan total ku nan ta hasi pa manehá e munisipio Putten adekuadamente.
Semper ta masha fásil pa wak nos isla for di un business class di KLM i rápidamente determiná kuantu empleado públiko tin i kuantu e gastunan ta. Lo mester ta konosí pa e eskritor tambe ku kualke empleado públiko òf miembro di Konseho Insular na Boneiru mester ta i ta un shenpia. Tur hende (pueblo di Boneiru i tur entidat hulandes) korektamente ta keha ku akinan tur kos ta bai pokopoko i ku produktonan final konkreto no ta bira visibel pa kaba. Tumando e proyekto di bibienda komo ehèmpel, e eskritor a yega di para ketu na kuantu empleado públiko di kuantu ministerio i kuantu eksterno a okupá nan mes tras di kòrtina ku e proyekto akí? Kuantu konseho i rapòrt a skirbi promé ku por ehèmpel den munisipio Putten un miembro di konseho munisipal lo por tuma un desishon tokante konstrukshon di bibienda. E ora ei pues ta hopi simplístiko pa husga un miembro di Konseho Insular di Boneiru a base di su kompensashon di formalmente algun ora pa siman? Esaki miéntras ku e eskritor ta realisá hopi bon ku un miembro di Konseho Insular nunka no por hasi esei den e kantidat limitá di ora ei. Kiko e eskritor ta pensa di e adagio: ‘An honest day pay for an honest day job’? Naturalmente mi por dediká atenshon tambe na e komparashon ku e munisipio Haarlemmermeer. Pero mi ta sigur ku esaki no ta bai kai na agrado di e eskritor.
Ku e Representante di Reino a resistí djis pa forma, ta komprendibel. Esaki pasobra e Representante di Reino sa masha bon kua ta e trabounan i komponentenan ku mester inkluí pa por hasi un komparashon hustu. E Representante di Reino a yega di wak e aparato di RCN i e kantidat di sosten ku ta keda suministrá alabes for di e munisipionan, provinsianan i Reino? Hopi sabí di parti di e Representante di Reino ku e no ta bai hinka su mes den e diskushon akí. Tokante e ‘governance’ rònt di e Representante di Reino mi no ta bai papia awor akí.
Un detaye chikitu: E remarke tokante biahamentu den business class tambe innesesariamente ta un instigashon. Lo tabata bon pa e haña un imágen kompleto i pa e forma su opinion si e eskritor lo a tira un bista den e areglo di biahe di trabou den e CAO di Reino. Den e areglo akí tin entre otro formulá: ‘Bo tin mag di biaha den business class òf den un klase komparabel si e tempu di buelo pa bo biahe di trabou ta seis ora òf mas i si pa bo biahe di trabou un ticket den e klase ei ta disponibel. Esaki ta konta tambe si bo biahe di trabou ta konsistí di mas ku un buelo’. Esaki práktikamente ta enserá ku no solamente prominentenan, pero tambe kualke empleado públiko for di eskala di salario 3 tin mag di biaha business class for di Amsterdam pa Boneiru i visa vèrsa. I tene kuenta ku kada empleado públiko ta paga bon tinu riba su obligashonnan i derechonan, i pues ku hopi biaha e business class di KLM ta yen di empleado públiko. Kasi mi por bini ku e ponensia ku si e empleado públiko di eskala di salario 3 ta biaha economy class tòg, i despues e tin keho di doló di lomba òf pia hinchá, e por mèldu esaki serka e dòkter di empresa, i ku su hefe lo haña un ‘skual’.
E frase final di e artíkulo ta kuadra i mi ta para su tras tambe. ‘E miembronan di Konseho Insular ta realisá ku nan t’ei pa pueblo i no lo kontrali’. Pa duna kontenido na esaki bo mester fasilitá e miembronan di Konseho Insular tambe pa por ehersé e ròl krusial akí. Mi ta teme ku a base di e komunikado akí ta bai surgi un diskushon di ‘ta bèrdat’ i ‘no ta bèrdat’, i ku nos tur ta bai mustra otro ku dede i bai kontrolá sumanan i/òf komponentenan apart. Mi ta teme ku e eskritor i tur hende ku ta hala rosea ta bai tuma e artíkulo akí komo un motibu pa bai tira lodo atrobe.
Lo úniko ku mi ta pidi i ta spera ta: laga nos huntu ban wak ken tin ku hasi kiko, i kiko tur ta nesesario (gastu i kapasidat) pa sòru ku pueblo di Boneiru por ta orguyoso di tur e kosnan bunita ku ta keda realisá na nan dushi isla. I bai wak den direkshon di un koherensia total.
PS: Pa loke ta trata e fecha di 3 di òktober 2023 i e konstelashon di Konseho Insular na e momentu ei i e echo ku e ordenansa a keda aprobá unánimemente, e eskritor no a dediká niun pia di palabra na esaki.