E inisiativa tin komo meta pa selebrá habitantenan lokal ku ta personifiká e espíritu boneriano i pa enkurashá nos bishitantenan pa kompartí storia positivo tokante nan eksperensia ku e poblashon lokal na nos isla.
Junela Nicolaas a haña rekonosimentu pa e echo ku e tabatin un impakto grandi riba bishitantenan di nos isla, loke ta un ehèmpel pa e tremendo servisio ku nos hendenan ku ta traha den sektor turístiko ta ofresé na nos bishitantenan. Junela su nominashon a bini di parti di Mike i Suzanne Baach, kendenan a konta un storia konmovedor di su hospitalidat eksepshonal. Algun aña pasá nan a topa Junela pa promé biaha tempu ku e tabata traha na Courtyard by Marriott, kaminda el a duna nan un bon bista general di Boneiru. Despues nan a mir’é trahando na aeropuerto, kaminda el a rekonosé nan no opstante e tempu largu ku e no a mira nan mas. Durante un retraso di buelo asta el a duna nan un brasa, loke a pone nan sinti nan mes bon biní i apresiá. Esaki ta personifiká e kompromiso di hopi aña largu di Boneiru: “Once a visitor, always a friend”.
Tourism Corporation Bonaire ta felisitá Junela Nicolaas ku su ekselente kontribushon na nos sektor turístiko i pa motibu ku e ta un representante ehemplar di nos poblashon lokal.
E kampaña di Bonaire Friends ta un invitashon kontinuo na nos bishitantenan pa kompartí nan storianan tokante nos habitantenan lokal ku a hasi nan eksperensia na nos isla inolvidabel. Ta enkurashá bishitantenan pa manda nan storianan, potrètnan òf videonan pa e página spesial di Bonaire Friends riba: https://bonaireisland.com/bonaire-friends/.