Djaweps 22 di mei 2025 Tourism Corporation Bonaire (TCB) a rekonosé tres bishitante prosedente di Merka komo embahador di Boneiru.
Ta trata aki di Leslie Schwartz i Walt Brodrick ku ta bishitando Boneiru pa 10 aña konsekutivo, miéntras Jozef Priller a risibí e distinshon di mas haltu pa e 30 añanan ku e ta bishitando Boneiru.
“Nos ta bishitá Boneiru anualmente ku nos grupo di buseo for di Merka i nos ta enkantá ku e laman kristalino ku ta rondoná Boneiru. Boneiru su hendenan ta destaká den amabilidat i kada biaha di nobo nos ta disfrutá di Boneiru su gastronomia ekselente”, segun nos embahadornan nobo.
E seremonia di rekonosementu di Leslie Schwartz i Walt Brodrick a tuma lugá na Sand Dollar Condominiums i esun di Jozef Priller na Plaza Resort Bonaire. Ámbos seremonia tabata na enkargo di Helen Mercera di TCB.
