ORANJESTAD, Aruba
Lider di Fraccion di POR, Dellanire Maduro, durante conferencia di prensa a comenta cu casi dos siman pasa a presenta e plan di prevencion for di Ministerio di Salud Publico den cual ta papia di e diferente maneranan cu por traha na un forma mas eficiente pa preveni enfermedadnan cronico. Entre esakinan por menciona diabetes y enfermedadnan cardiovascular, cual ta enfermedadnan cu ta predomina na Aruba.
A presenta diferente strategia, puntonan cu por traha riba dje pa fuera di educa por reenforsa e structuranan existente pa e informacion por yega mas facil na comunidad, pero tambe pa comunidad sa unda pa bay, kico pa haci y ki caminda pa cana pa no warda ora ta laat. Esaki pa evita cu e lo bay a costo di e calidad di bida di e persona, pero tambe a costo financiero di cada un di nos, pasobra nos tur ta aporta na AZV.
Relaciona cu esaki, na momento cu Dellanire a traha como consehero di Ministerio di Salud Publico, el a tuma e desafio di pensa riba un concepto di con por actua na un forma mas preventivo. Despues di a reuni cu diferente instancia a yega na e conclusion cu mester bin cu un manera pa evalua y reduci e riesgo pa comunidad cu ta padece di cierto enfermedadnan sigui crece.
Awo como representante di pueblo, e ta haci apelacion na Minister di Salubridad Publico pa conhuntamente cu Departamento di Salud Publico sigui desaroya e concepto aki, pasobra ainda tin varios punto cu mester atende cu nan.
Tambe e parlamentario di POR a comenta riba e investigacion haci door di AZV riba e costonan y cuanto cada asegurado ta costa. Mirando e costo halto, e ta considera cu mester busca e manera pa haci cuido medico sostenibel mirando cu e grupo di hendenan riba 60 aña a sigui crece. Ya caba mas di 28 mil persona ta riba e edad aki, cual ta hopi grandi y mester wak con ta haci pa por sigui brinda cuido, pero no cu aki por ehempel 5 aña no por carga esaki mas.
Mirando esaki, den su calidad di Presidente di e Comision Fiho di Asuntonan Social, Famia, Cuido pa nos Grandinan y Hubentud, ta bay manda un invitacion pa AZV pa acudi na Parlamento y duna un splicacion mas detaya riba e investigacion haci pa asina mira con como Parlamento por aporta.
