Aunke cu Mike Eman mes no a haci acto di presencia na e dia nacional “ Dia di Betico” e generacion nobo di AVP tabata presente, Lijsttrekker di partido AVP Wendrick Cecilia ta duna di conoce cu dia di Betico ta un dia hopi special pa Aruba y sigur un pabien na famia pero specialmente un pabien grandi na comunidad di Aruba.
Parlamentario Wendrick Cecilia ta kere cu Aruba a desaroya di un manera hopi positivo y tur e aspectonan positivo y tur e aspectonan positivo cu Aruba tin awe na un Pais desaroya , un economia fuerte y un Pais cu un estado di derecho fuerte y un democracia bibo ta danki na heroenan y lidernan nacional cu a yuda construi esaki. E arkitecto nan di tur e structuranan aki manera Betico Croes, Shon A Eman, Henny Eman y Juancho Irausquin merece di wordo reconoci den e historia politico di Aruba di nos Pais.
Parlamentario Wendrick Cecilia ta kere cu presencia di parlamentarionan di AVP ta netamente pa reconoce e arkitecto nan aki cu ta lidernan cu a cana prome cu nos y duna nos e Aruba cu awe nos tur ta gosa di dje. Nan ta esunnan cu a habri e caminda pa hobennan den politica ricibi e herencia di un Pais desaroya, un Pais cu structuranan fuerte di derecho di estado y di democracia. Pesey mes dia di Betico ta un dia hopi special unda cu nos tur mester celebra.
No ta un secreto cu Betico Croes a Sali for di e cuna di AVP y a identifica su mes cu e ideologia y pensamento di AVP y Parlamentario Wendrick Cecilia ta kere no obstante cu ta contrincantenan politico pero por bisa aliado democratico. Parlamentario Wendrick Cecilia ta kere cu esaki ta e palabranan di union , cu ta palabranan tambe cu Betico Croes a comunica cu ne esta union, libertad y amor . E palabranan aki ta fuentenan di inspiracion pa futuro politiconan.
AVP ta presente pa rindi homenahe na Betico Croes pero tambe na famia di Betico cu a sacrifica nan tata pa Aruba, manera a indica den e discurso cu Betico Croes tabata un tata pa famia y pa un nacion. Parlamentario Wendrick Cecilia ta kere cu personahenan y lidernan nacional cu a duna nan contribucion na desaroyo di Pais Aruba merece nan luga honorabel den historia politico di nos Pais.
Sinembargo awor ta keda na e generacion nobo den politica pa traha historia nan nobo den politica cu e liña cu nos antepasadonan a cuminsa cu ne. Parlamentario Wendrick Cecilia ta kere cu union ta e clave den tur tipo di proceso politico cu ta hiba. Na e momentonan aki tin hopi retonan riba nivel di Reino Hulandes unda cu Pais Aruba mester bay atende cu nan, pero na mes momento Parlamentario Wendrick Cecilia ta indica cu nos mester realisa cu temponan ta diferente , temponan a cambia y decisionnan politico awendia cu mester wordo tuma ta decisionnan hopi fundamental pa nos Pais , pero ta kere cu mester pone cosnan den balans, pero e palabra clave ta UNION.