Durante e conferencia di prensa di e gobierno di Pik Pisas , prome minister di Corsou a trata e asunto tocante introduccion di un orario di calor (hitterooster), a indica ayera cu e meta ta pa
tur salon di klas den e enseñansa cu ta ricibi subsidio, haña airco den e lokaal.
Pa esaki tin mester un total di mas cu 2100 unidad. E necesidad ta asina grandi, special si tuma
na cuenta cu ta nos yiunan ta bay den klas calor. E meta ta pa realisa esaki den un periodo di dos aña, manera a anuncia ayera. Antiguo director di Aqualectra, Darick Jonis, cu su compania DISC NV a realisa un inventarisacion pa e proyecto aki. E compra di e airconan ta involucra un inversion di 2.8 miyon florin.
Na mes momento, e costo total di electricidad pa scolnan lo aumenta pa 1.2 miyon florin pa luna, dor di e airconan adicional aki cu lo representa un carga di 14.4 miyon florin riba presupuesto di gobierno. Pa e motibo ey, ta purba pa conecta e airconan na panelnan solar mas tanto cu por. E idea ta pa e energia genera durante dia por wordo entrega atrobe na Aqualectra y asina yuda baha e costonan di operacion.