E aña aki tawata un excelente aña pa nos industria di turismo. As a matter of fact e ta wordo considera como e miho aña den nos historia. E indicadornan cu ta midi nos turismo ta e cantidad di bishitantenan stayover, e ocupacion di hotelnan, e average daily rate, e REVPAR, e tourism receipt y e cantidad di bishitantenan crucero. Tur e indicadornan aki cu ta midi e resultado di nos turismo ta confirma cu e aña 2023 ta uno historico pa pais Aruba.
Minister Oduber ta hopi agradecido y contento cu e resultadonan aki di turismo cu a contribui na un crecemento economico di double digits.
Despues di temponan hopi dificil di pandemia, e enfoke principal di e maneho tawata dirigi pa recupera nos turismo y yega bek e nivelnan di aña 2019. Awe nos ta contento, cu no solamente Aruba a yega bek nivelnan di aña 2019 sino nos a logra surpasa e resultadonan di aña 2019, algo cu sigur ta remarcabel.
E maneho cu ta wordo hiba pa minister Oduber ta concentra riba 3 aspecto hopi importante:
- Trece e turista afluente, e turista di calidad
- Diversifica nos turismo
- Haci inversionan continuo den mehoracion di producto Aruba.
Nos por mira a base di e indicadornan cu ta midi nos turismo cu a maneho cu ta ser hiba a duna e resultado cu ta busca. Pa aña 2023 Aruba a proyecta di bai ricibi riba 1.2 miyon turista stayover. Actualmente Aruba ta conecta cu mas di 35 destinacion mundialmente y tin mas di 25 aerolinea bulando pa Aruba.
E grado di ocupacion di hotelnan te cu final di november 2023 tawata na 78% cual sigur ta uno hopi halto. Banda di esaki nos por wak cu e ADR cu ta e average daily rate (prijs pa camber averahe pa anochi) ta na $334.29 te cu final di luna di november 2023 cual ta un aumento di 24% den comparacion cu aña 2019. Esaki ta un indicador importante pa midi e calidad di turistanan y na momento cu hotelnan ta registra un crecemento den ADR ta indicativo cu e calidad di turistanan tambe a mehora.
Banda di e ADR, e REVPAR cu ta e revenue per available room tambe a conoce un aumento significativo den aña 2023 den comparacion cu aña 2019. Pa aña 2023 e REVPAR ta na $259.45 y esaki ta un crecemento di 13% den comparacion cu aña 2019.
E indicador mas importante pa midi e calidad di nos turismo ta e “tourism receipt” cu ta wordo midi pa Banco Central Aruba. Esaki ta e cantidad di placa cu turistanan ta laga atras den nos economia. Pa aña 2023 e tourism receipt ta proyecta pa yega 4.9 BIYON florin. Esaki ta un crecemento di 1.5 BIYON florin y un aumento di 44% den compracion cu aña 2019. E tourism receipt ta confirma cu ta turistanan afluente y di calidad ta yegando Aruba, turistanan cu ta duna un contribucion significativo na nos economia. E indicador aki ta reafirma cu e maneho cu ta ser hiba, esta pa trece e turista afluente, e turista di calidad ta dunando resultado positivo.
Danki na e crecemento robusto aki di e tourism receipt, economia di Aruba a crece cu 10.3%. Ta e crecemento aki di tourism receipt a contribui na un surplus di presupuesto y mehoracion den e fondonan di tanto AZV como Svb. E spinoff economico di turismo ta grandi y e nos ta mira con Aruba ta prosperando bek y progresando.
Sigur importante pa nos turismo ta turismo crucero cu aña 2023 a mira un recupracion di casi 90% den comparacion cu aña 2019. Turismo crucero ta proyecta pa surpasa e resultadonan di aña 2019 den aña 2024 cual sigur ta un bon noticia pa comparti.
Minister Oduber ta hopi contento, agradecido y orguyoso di e resultadonan di nos turismo. Turismo a demostra un biaha mas su importancia pa nos pais y cu e ta keda e ‘’driver’’ principal di nos economia. Minister Oduber ta kere den teamwork y traha den bon synergia cu e partnersnan di nos turismo y esaki a conduci na e resultadonan aki. Un bon partnership di confianza y respet pa percura pa logra e mihor resultadonan pa nos pais Aruba.
Minister Oduber kier a gradici tur partner den e industria, ATA, AAA, APA, AHATA, ATSA, Aruba Vacation Rental Association, tur departemento di gobierno cu ta brinda servicio na nos huespednan, taxistanan, companianan den e industria y mas importante tur esnan cu ta labora den e industria di turismo. Danki di curason pa boso esfuerzonan cu awe Aruba ta asina exitoso den turismo. Pa aña 2024 tin proyecta un otro bon aña pa nos turismo y nos ta convenci cu hunto nos lo logra.
Finalmente minister Oduber ta desea nos comunidad un feliz y prospero aña 2024 yena cu salud, bendicion, prosperidad y exitonan.