Diahuebs atardi Minister Endy Croes a ricibi bishita di e atletanan di Gihae Gymnastics cu a regresa Aruba despues di un tremendo competecia den e Magical Classic Gymnastics 2022 cu a tuma luga na Orlando, Florida. E competencia tabata uno di nivel hopi halto unda un total di 15 atleta a representa Aruba y a logra di conkista 48 medaya incluyendo 4 medaya di oro, 3 plata y 1 brons.
Den nomber di Gobierno di Aruba y Ministerio di Deporte Minister Endy Croes a haci entrega di un ‘water bottle’ personalisa na cada atleta como mustra di aprecio y gratitud pa e logro grandi aki. E Mandatario a gradici e atletanan: Alizey Polanco, Kelsea Rivero, Kaelyn Palma, Abigaile Croes, Kylee Thomas, Shiara Mathilda, Jira Oleana, Jeandyenne Koolman, Sofia Campo, Abbygail Wever, Chloe Cen, Eline Hernandez, Zidaeny Nicolaas, Jayly-Ann Wester y Casey Provence pa nan dedicacion, pasion y aporte den deporte di ‘gymnastics’. E atletanan a sali masha contento y nan a encanta nan regalo.
Masha pabien ta bay na e atletanan y entrenadornan pa nan tremendo participacion y laga Aruba su nomber briya y resona den exterior. Alabes ta gradici e e mayornan cu ta duna nan yiu e sosten pa nan por eherece cu amor y pasion e deporte.
