Minister di Husticia, Integracion, Transporte Publico y Energia, mr. drs. Arthur Dowers, recientemente a realisa diferente bishita espontaneo na localidadnan bou di su responsabilidad caminda actualmente trabounan di renobacion y mehoracion ta tumando luga.
Entre e localidadnan cu Minister Dowers a bishita tin Korrektie Instituut Aruba (KIA), Politie Opleidinginstituut Edgar Joaquin (Watty) Vos y dependance di DIMAS situa na San Nicolas.
E obhetivo di e bishitanan ta pa Minister por constata personalmente con e trabounan ta progresando, unda tin adelanto y unda eventualmente tin atraso of asunto cu ta rekeri atencion adicional.
Pa Minister Dowers, follow up di proyecto no mester limita na informe y reunion. Specialmente ora ta trata di facilidadnan cu durante hopi tempo a enfrenta problema di infrastructura, e ta considera importante pa bay riba tereno, mira e situacion cu su propio wowonan y tene contacto directo cu esnan cu ta responsabel pa e ehecucion.
Atencion particular pa situacion na KIA
Na KIA, e necesidad pa mehoracion ta particularmente urgente. E condicion di diferente parti di e compleho ta exigi inversion y follow up constante, tanto pa crea condicionnan mas adecua pa e presonan como pa e personal cu diariamente mester traha den e facilidad.
P’esey, Minister Dowers kier sigui e proceso personalmente y verifica cu e trabounan acorda ta tumando luga. Caminda atraso of obstaculo presenta, e intencion ta pa identifica esaki na tempo y busca con e por atende pa evita tardansa innecesario.
E mesun forma di follow up a conta pa e renobacion di Politie Opleidinginstituut Edgar Joaquin (Watty) Vos, caminda trabou ta ehecuta pa gradualmente rehabilita y amplia e facilidadnan di formacion policial.
Tambe na edificio cu lo ta designa como dependance di DIMAS na San Nicolas, Minister a constata personalmente e progreso di e trabounan y e puntonan cu ainda mester ricibi atencion.
Resultado di e follow up
E bishitanan espontaneo ta forma parti di e manera cu Minister Dowers kier sigui e proyectonan bou di su responsabilidad. E meta ta pa no solamente inicia renobacion, sino sigui nan durante ehecucion y atende na tempo ora tin situacion cu por causa atraso.
Segun e mandatario, cada un di e facilidadnan aki tin un funcion importante dentro di servicio publico. P’esey, inversion den nan infrastructura mester finalmente traduci den miho condicion di trabou pa personal, facilidadnan mas digno y un servicio publico cu por funciona den condicionnan adecuado.
E prioridad ta pa mantene follow up constante y procura cu cada proyecto cu a wordo poni na marcha realmente sigui avansa te su finalisacion.
