Diaranson mainta, Minister di Finansa, Asunto Economico y Sector Primario, mr. Geoffrey Wever, den su calidad di representante di Land Aruba como unico accionista di Free Zone Aruba N.V. (FZA), a reuni cu e Hunta di Comisario di Free Zone Aruba NV.
Durante e reunion a presenta e cuentanan anual pa aña fiscal 2024 y a elogia e maneho di e Hunta di Comisario, bow guia di President-Commissaris mr. Patrick Brown y di e directiva pa e manera cu nan a cumpli nan tarea y pa e forma cu nan a guia e proceso di transicion. Despues di un proceso di reorganisacion di Free Zone Aruba NV, cu pa añanan a hiba perdida, e resultado pa 2024 a conoce un incremento di entrada di mas o menos 400 mil (27.5%) compara cu 2023. Un “net result” di 320 mil florin y un “operating result”di 85 mil florin. Por nota cu e cambionan cu a haci den e empresa a duna su frutanan, y tambe e hecho cu companianan nobo a bin establece den Free Zone Aruba NV a trece entredanan adicional, cual ta un desaroyo positivo. Proyeccionnan pa aña 2025 ta mas positivo ainda cu 2024.
Minister Wever ta felicita e Hunta di Comisario y e empleadonan di Free Zone Aruba NV pa nan esfuerso pa recupera y fortalece stabilidad financiero di Free Zone Aruba NV y a enfatisa cu e situacion financiero ta demostra un mehoracion significativo, y ta refleha e resultado di un maneho mas estricto.
Hunto cu Free Zone Aruba NV ta den e proceso di formalisacion di un acuerdo laboral nobo cu un director di Free Zone Aruba NV. A haci un proceso di solicitacion publico caminda cu tur hende por a participa y pronto lo anuncia ken lo bira e director nobo di Free Zone Aruba N.V. cu lo cuminsa maneha e empresa desde 2026 pa hiba e empresa den un era nobo.
Minister Wever ta gradici tur cliente di Free Zone Aruba NV, e Hunta di Comisario y tur e empleadonan di Free Zone Aruba NV cu ta haci posibel pa empresarionan por tin nan negoshi estableci den Free Zone Aruba NV.
E reunion aki ta confirma e compromiso di Gobierno di Aruba pa fortifica e institucionnan cu ta fundamental pa desaroyo economico sostenibel di nos pais, den linea cu e meta di “Programa di Gobernacion AVP-FUTURO 2025-2028”.
Press release: Gobierno di Aruba
