Cuminsando 1 di augustus 2026, consumidor na Aruba lo beneficia di un proteccion importante nobo: un porcentahe maximo di 25% riba credito di consumidor otorga desde 1 augustus 2026. Cu esaki, pa prome biaha ta existi un limite legal riba e interes y costonan cu por wordo cobra riba credito; credito di placa, credito di bienes of ora di empeña articulonan.
E regulacion aki ta wordo introduci door di e entrada na vigor di articulo 5 di e Landsverordening Regeling Consumentenkrediet (LCK). E articulo aki ta forma e base legal pa regula e costo di credito y pa preveni situacionnan unda consumidornan por wordo confronta cu carganan financiero excesivo.
Prome cu e regulacion aki, Aruba no tabatin un limite legal riba e costo di credito di consumidor. E entrada na vigor di e regulacion aki ta marca un milestone importante den un proceso cu a cuminsa durante e gabinete anterior, ora Minister Geoffrey Wever tabata Minister di Asunto Economico. Durante e periodo ey, a wordo inicia e preparacionnan, investigacionnan y dialogonan cu stakeholdernan. Awo, despues di e trabou preparatorio, e regulacion finalmente ta drenta na vigor y ta bira un realidad pa consumidor na Aruba.
E porcentahe maximo di interes riba credito di consumidor stipula na 25% ta e elemento central di e prome fase di implementacion di e Landsverordening Regeling Consumentenkrediet (LCK). Cu e limite legal aki, gobierno ta establece claramente te unda e interes y costonan di credito por yega, duna consumidor mas seguridad y mas proteccion den mercado financiero.
“Cu e introduccion di e maximo di 25%, nos ta pone un limite cla pa proteha consumidor. Esaki ta un paso historico den fortalecemento di derechonan di consumidor na Aruba. E ta tambe un milestone importante den un proseso cu nos a inicia durante e gabinete anterior y cu awo finalmente ta drenta na vigor pa beneficio di tur consumidor,” segun Minister di Finansa, Asunto Economico y Sector Primario, mr. Geoffrey Wever.
E reglamentacion ministerial basa riba articulo 5 ta establece tambe reglanan pa ora di haci pago riba pagonan atrasa (vertragingsvergoeding), ora haci pago anticipa di prestamo (vervroegde aflossing) y ora di gastonan di incasso extrahudicial (buitengerechtelijke incassokosten).
Segun Minister Wever, e introduccion di e maximo di 25% ta crea un mihor balansa entre proteccion di consumidor y disponibilidad di credito.
“Nos ta reconoce cu hopi famia y individuo ta depende riba acceso na credito. Pa motibo ey nos no kier limita acceso na financiamiento, pero si nos kier evita cu consumidornan paga costonan excesivo. E maximo di 25% ta crea e balansa entre proteccion y acceso.”
Minister Wever a enfatisa cu e entrada na vigor di articulo 5 no ta significa cu henter e Landsverordening Regeling Consumentenkrediet (LCK) ta drenta na vigor inmediatamente. E otro componentenan importante di e ley lo wordo implementa den un fase posterior.
Demas componente di e Landsverordening Regeling Consumentenkrediet (LCK) cu lo ser implementa mas despues ta obligacionnan di informacion mas amplio pa proveedornan di credito, normanan pa otorgacion responsabel di credito, introduccion di un registro di credito, instrumentonan di supervision y cumplimiento.
“Nos ta cuminsa cu e componente cu tin e impacto mas directo pa consumidor: e limite maximo di 25% riba e costo di credito. Ta cuminsa cu e limite aki pa e periodo 1 augustus 2026 te cu fin di december 2027. Despues lo sigui e otro componentenan importante cu ta forma parti di e Landsverordening Regeling Consumentenkrediet (LCK),” Minister Wever a declara.
“Nos a scoge pa implementa e regulacion aki cuidadosamente pa mantene un balansa entre proteccion di consumidor y stabilidad di mercado. Nos kier proteha e consumidor y na mes momento nos ta reconoce e importancia di e negoshinan cu ta ofrece credito pa hopi famia y individuo. Pa e motibo ey, nos lo sigui monitorea e impacto di e regulacion y evalua cuidadosamente e efectonan.”
Pa e momento aki, e introduccion di e maximo legal di 25% tin principalmente un efecto di derecho civil. Esaki ta nifica cu consumidornan por invoca e norma legal nobo dilanti huez ora un proveedor di credito no ta cumpli cu e limite estableci. Cu e implementacion gradual di e otro disposicionnan di e Landsverordening Regeling Consumentenkrediet (LCK), incluyendo supervision, autoridadnan competente lo por supervisa cumplimiento di e ley y ora ta necesario, interveni directamente contra incumplimentonan.
Cu e introduccion di e maximo legal di 25%, Gabinete AVP-Futuro ta duna consumidor un proteccion concreto y inmediato y ta stimula un ‘level playing field’ den e segmento di mercado aki, mientras cu Aruba ta sigui traha riba implementacion gradual di e otro componentenan importante di e Landsverordening Regeling Consumentenkrediet. Minister Geoffrey Wever ta jama danki na Centrale Bank van Aruba y Directie Wetgeving en Jurisdische Zaken pa e trabounan haci.