Simplificacion di otorgamento di permiso y un loket virtual pa tur peticion di permiso pa negoshi, ta aporta na miho “costumer-service” pa comerciantenan y na e clima empresarial y di inversion di Aruba.
E leynan di otorgamento di permiso pa negoshi ta anticua, e meta di e maneho economico cual mester ta e base di e leynan aki no ta claro y sa di ta di aña 1945 y basa riba e situacion di Corsow di e tempo ey. Den proyecto 1 “Aceleracion y mehoracion di proceso di permiso” e permisonan di establecemento di negoshi, permiso di horeca, otorgamento di tereno, permiso di construccion y permiso di estadia y trabou, lo wordo revisa y componentenan innecesario lo wordo kita. E meta di maneho di cada permiso lo wordo formula di nobo y alinea cu e circumstancianan economico actual. Esaki por resulta den cambionan di ley. Criterio pa evaluacion di peticionnan di permiso lo wordo explicita y e termino pa decision wordo tuma riba peticionnan hasi lo wordo explicita y acelera.
Minister Geoffrey Wever: “Gobierno mester crea e condicionnan pa facilita comerciantenan haci negoshi y innova”. Una vez proyecto 1 wordo finalisa, proyecto 2 “Sistema coherente di permiso tras di un loket virtual” lo cuminsa cu e proposito pa comerciantenan por pidi y haya nan permisonan cu termino claro di decision riba peticionnan hasi. E backoffices di e diferente departamentonan cu ta otorga permiso lo wordo coordina y lo wordo integra unda ta posibel.
Minister Geoffrey Wever: “Un cuadro legal nobo y un structura solido pa un economia nobo unda e comerciantenan por tin e confiansa y garantia den proceduranan concreto y transparente”.