Durante un rueda di prensa dialuna mainta, Gobierno di Aruba den persona di Minister Glenbert Croes y Directornan di Utilities, WEB y ELMAR a anuncia di a inicia cu e proceso di un parke nobo di Molina di biento. Tur esaki den cuadro di e maneho di transforma Aruba su dependencia riba crudo HFO pa un energia duradero, sostenibel, limpi y principalmente pagabel pa nos pueblo consumidor.
Durante su presentacion den Rueda di Prensa e mandatario a expresa cu “Mundo na e momentonan aki ta para dilanti desicionnan crucial cu mester wordo tuma, pa salba economia di paisnan y pa salba nos Planeta.
Dicon mi ta bisa esaki; despues di e crisis di Pandemia, problemanan Geopolitico y guera a conduci na un Crisis di Energia cu na mesun momento a crea un Crisis Economico cu un inflacion yama “Energy Inflation” cu ta causando impacto negativo economico rond mundo. E inflacion aki a subi prijs di tur cos den tur pais y esaki awor a combina cu e Crisis Climatico cu ya tabata formando su mes for di ultimo añanan. Boso mes por mira den media e efectonan devastador di cambio climatico den un cantidad di pais; ola di calor, secura y awor transporte via riunan na Europa y Asia ta paralisa pa motibo cu riunan ta secando y nivel di lama ta subiendo.
Aruba manera cu boso tur sa, a wordo devasta pa e Pandemia Mundial di Covid. Segun expertonan, Aruba mas cu tur otro pais na mundo a keda afecta economicamente mas severo, debi cu ta solamente un pilar economico nos tin, cual ta Turismo.
Hustamente awor, na momento cu nos ta recuperando den gran forma nos Turismo, y e Economia a cuminsa brinda nos pueblo empleo atrobe, pa cada famia recupera nan bienestar, ata guera y crisis mas crisis.
Sinembargo nos Gobierno a sigui monitoria tur situacion di crisis di cerca, nos companianan di Utilidad manera ta conoci, a absorba mas cu nan por di e impacto di aumento di costo di energia. Sinembargo pa nan por sigui opera pa Aruba como pais por sigui funciona y desaroya, e prijsnan mester a wordo ahusta. Cu menos efecto inflatorio y mas social cu ta posibel.
Afortunadamente Gobierno di Aruba bou liderazgo di nos Minister President Evelyn Wever Croes, ya tabatin su PLAN NACIONAL DI ENERGIA cla, y cual ta inclui reduci dependencia di HFO y expande nos capacidad pa produci mas
Energia di e Biento cu ta supla constante; e Noord Oost Pasaat cu nos dushi isla di Aruba ta bendiciona cu ne. Y tambe genera mas tambe mas energia di Solo.
Na aña 2008 Gobierno di MEP bao liderazgo di Sr. Nelson Oduber como Prome Minister e tempo aya, ya a dal e prome paso pa Aruba a construi su prome Parke di Molina na Vader Piet. Na aña 2009 el a drenta den funcion produciendo 30 Megawatt di coriente cual ta bon pa 16 % di e total di capacidad di coriente cu Aruba tin mester.
Pa e siguiente añanan Utilities Aruba hunto cu WEB y ELMAR lo tin e tarea pa ehecuta e PLAN NACIONAL DI ENERGIA di Gobierno pa logra cu nos mes ta produci 45 pa 50 % di nos energia; cual lo ta limpi, renobabel y pagabel, y pa 2050 nos lo por logra di ta “Klimaat Neutraal” Esta cu nos a logra elimina tur emision di CO2 of si tin mes; nos lo tin suficiente produccion di energia limpi pa compensa e cantidad di CO2 emiti.
Ta pesey Gobierno actual ya a logra interesa e compania di Gas Natural – Eagle LNG pa suministra WEB Aruba cu Gas Natural como e fuel di transicion.
Awe e siguiente paso ta pa anuncia cu ta expande nos capacidad di Energia di Biento cu e anuncio oficial. Asina pronto nos lo yama ayo na HFO y bonbini na un futuro di Energia mas limpi, renobabel y cu prijs stabiel. Tur esaki lo ta bon pa nos Economia, nos Salud y bon pa nos Planeta. Pesey awe ta un dia grandi y balioso pa Aruba, cu e anuncio di un di dos Parke di Molina pa Aruba”, minister Glenbert Croes a termina bisando.