Abogado Vito Carlo a duna di conoce cu a ricibi un e mail prome cu merdia unda Hues a realisa cu e la haci un fayo huridico, dus tecnico y kier a tres esaki recht, Abogado Vito Carlo ta duna di conoce cu Otmar Oduber a keda declara liber di soborno y pa es motibo aki mes e sistema di ley no ta duna e oportunidad pa e Hues kita su derecho pa e por postula su mes eligibel den un partido politico.
Den e sentencia di siman pasa Otmar Oduber a haya un condena cu e no por ta miembro di staten pa 3 aña, pero awe e Hues a bin bek riba esaki y duna di conoce cu e la haci un fout huridico chikito segun e Hues , pero pa e abogado e ta un fout grandi mirando e consecuencianan cu por tin.
No ta un secreto cu Otmar Oduber a pasa den momentonan hopi duro na momento cu nan a drenta su cas y caso flamingo a inicia , e la haya problema cu su famia, problema personal, financiero , momentonan hopi duro cu e la pasa den dje.
Practicamente Ministerio publico a cuminsa un caso di Flamingo asina grandi cu acusacionnan asina grandi den e caso , pero Otmar Oduber a Sali liber di tur e acusacionnan ey den e caso grandi di Flamingo. Pero den e transcurso cu no tabata por a culpa Otmar Oduber den e caso di Flamingo manera cu e la inicia, Ministerio Publico a bay busca otro cosnan cu no tin nada di haber cu e inicio di e caso Flamingo cu e la keda declara liber pa sigui persigui e politico y a keda wanta e caso pa no presenta e caso pa e caso yega na su final debi cu no tabata hayando nada rond di Otmar Oduber di loke inicialmente e caso Flamingo a cuminsa na dje. Asina ey a bin otro acusacionnan rond di e caso Flamingo cu den prome instante no ta caso Flamingo.
Den e caso Flamingo Otmar Oduber a keda acusa di ta den organisacion criminal, cu Otmar Oduber lo a gana miyones di florin y cu lo a horta landAruba y haci negoshi cu tereno di LandAruba.Tur e acusacionnan aki Otmar Oduber a keda laga liber di dje, puntonan cu ta inicio di e caso Flamingo y e motibo cu nan a drenta su cas, Otmar Oduber ta liber di tur e acusacionnan aki.
Despues cu OM no por a haya nada riba Otmar Oduber Ministerio publico a sigui busca y a bin riba otro tipo di acusacionnan manera cu lo a privilegia dos persona, aunke e personanan aki no a haya e terenonan aki, pero ta acuse di a purba di duna dos tereno. Tambe e la keda acusa cu lo e la duna dos persona trabou y nan no a traha, pero siendo e personanan aki a traha y tambe tin ambtenaar cu lo a soborna Otmar Oduber pa haya un trabou na Gobierno.
Mirando e grandura di caso aki y cu Otmar Oduber a Sali liber di mayoria di e acusacionnan Oduber a haya castigo di 365 dia di castigo di cual loke cu e la sinta caba ta incondicional y e resto ta condicional cu tempo di prueba di dos aña. Esaki ta significa cu tanten cu Otmar Oduber comporta pa dos aña largo e no mester bay sinta e resto di mas cu 300 dia den KIA.
Como straf adicional Otmar Oduber a haya trabou pa comunidad di 240 ora y si e cumpli cu ne e no mester bay sinta e 120 dia pa cu e 240 oranan aki. Sinembargo e exigencia di ministerio publico tabata tres aña incondicional y seis aña cu e no mag di eherce su trabou como politico, pero awo e parti aki a cay full na awa y Otmar Oduber por keda cu su funcion como politico y eherce su trabou trankil.
Abogado Vito carlo ta kere cu e manera di proceder di Ministerio publico no ta bon y investigacionnan cu a tuma luga no a cana e caminda corecto y humano. Si berdaderamente tin un indicacion porehempel di cu Otmar Oduber ta un capo manera cu e mes ta menciona cu e la ser pinta den prome instante y no a haya nada di loke ministerio ta acusa di dje e caminda husto humanamente y corecto ta pa a cera e caso, pero ministerio publico a opta di laga e caso habri, hunga cu sentimento y emocion y bida di e persona sin duna claridad kedando cu e caso habri sin duna señal cu loke ta wordo acusa di dje no tin nada berdaderamente, pero ta uza e capa di e mes un puntonan di caso Flamingo pa busca otro situacionnan cu no tin nada di haber cu e inicio di e caso y OM a busca enemigonan di Otmar Oduber sea ta aproposito of no pa busca cualkier punto pa crea un acusacion nobo cu no ta e acusacion di inicio di caso Flamingo pa trata di condena Otmar Oduber mustrando cu e ta un capo , pero e realidad ta cu e no ta, paso hues a lage liber di tur e acusacionnan ey, esaki ta un manera inhusto y inhumano pa trata un hende.
Abogado Vito Carlo ta duna di conoce cu durante di tur e trayectorio a mustra ministerio publico cada bes cu loke ta insinua no ta loke boso ta kere , na varios ocasion abogadonan a trata di mustra ministerio publico cu nan no ta bon bezig. Banda di tur cos na momento cu ministerio publico ta persigui un persona ta e pueblo di Aruba ta paga pe, y e pregunta ta keda tipo di investigacionnan asina ta husto pa e persona? Y pa e pueblo di Aruba paga siendo cu e placa ey por uza pa cosnan pa por hiba Aruba padilanti? Ta importante pa ministerio publico por menciona cuanto ora y placa cada caso cu ta investiga ta tuma, principalmente caso Flamingo cu Hues a duna mas cu un señal na OM cu cosnan no a cana bon y corecto. Cuanto placa caso Flamingo a costa Pais Aruba realmente banda di tur e dañonan emocional y personal cu e la ocashona. Otmar Oduber tabata un ex vice prome minister di Pais Aruba berdaderamente e merece e trato aki unda cu e la sirbi su Pais pa añanan largo?.
Cu e e mail di Hues awe mainta abogadonan y Otmar Oduber ta contento cu Hues a reconoce e parti aki y hustamente a duna Otmar Oduber su derecho bek pa por ta den parlamento y por keda cu su trabou como parlamentario y tambe den e siguinte eleccion e por postula su mes den partido politico y cu e por sirbi su pueblo manera e la bin ta haci pa añanan largo y logrando cosnan grandi pa Aruba progresa cu hopi dedicacion y amor pa su Pais.
