Na Biblioteca Nacional a tuma luga un anochi dedica totalmente na rikesa y antiguedad di nos idioma Papiamento. E evento a atrai hopi hende y a trece un pensamento nobo riba e herencia linguistico di Aruba. Durante e anochi, autor y investigado Ramon Todd Dandaré a presenta documentonan di mas cu 300 aña bieu, cu ta demostra claramente e raiz profundo di Papiamento den historia.
Joyce Perreira, presidente di Fundacion Lanta Papiamento, a expresa gran satisfaccion cu e asistencia di e comunidad. Segun Perreira, hopi hende ainda no ta consciente di e historia largo di Papiamento, particularmente pasobra durante hopi aña e idioma no tabata forma parti di e curiculo scol y tabata mira como un idioma sin importancia.
Perreira a splica cu den tempo pasa, scolnan tabata mustra poco o nada di loke ta Aruba mes, su cultura, su ambiente y su propio pasado. Papiamento mes tabata prohibi den scol. Sinembargo, varios studio linguistico tabata tuma luga, aunke a tuma hopi tempo pa nan resultadonan bira disponibel pa publico. E investigacionnan aki ta duna un bista claro riba e desaroyo y evolucion di Papiamento.
Un mito cu hopi biaha ta ripiti te dia di awe ta cu Papiamento no tabata un idioma skirbi. E documentonan presenta a demostra cu esaki no ta berdad. Mientras cu Papiamento ta papia mas cu 300 aña na Aruba, Boneiru y Corsou, tin pruebanan di mas cu 250 aña di Papiamento skirbi, probando cu e idioma tabata bibo y ta desaroya mescos cu tur otro idioma oficial den mundo.
E posibilidad di studia textonan bieu ta permiti compara e manera di papia y skirbi den tempo bieu cu e forma moderno di Papiamento. Asina por haña e cambionan y influencianan linguistico cu a forma nos idioma. Dandaré su presentacion a mustra cu por drenta hopi profundo den e estructuranan y origen di Papiamento.
Perreira ta kere cu presenta e documentonan historico aki ta duna un empuhe nobo pa orguyo cultural y ta motiva mas Arubiano pa stima y aprecia nan idioma materno. E ta ripudi e idea bieu cu Papiamento no tabata tin balor. Ora cu Hulandesnan a yega Aruba, nan a referi na e idioma como “kalkoen taal”, un tipo di zonido sin balor, y a considera cu Papiamento no tabata propio pa siñamento. E mentalidad discriminatorio aki tabata domina scolnan durante hopi aña, aunke investigacion moderno a demostra cu esaki no tin fundamento.
Segun Perreira, bo idioma materno ta loke ta forma bo desaroyo intelectual y social. Investigacionnan ta mustra cu mucha siña y compronde hopi miho den nan mes idioma. Asina nan por pensa criticamente, lesa hunto cu comprension, skirbi cu claridad, y participa den discusion.
Perreira a agrega cu anochinan informativo manera esaki ta esencial pa aumenta conocemento riba e balor di Papiamento. Trece resultadonan di investigacion na comunidad ta fortalece orguyo y stima pa nos idioma nativo
