PoliticaLocal

Parlamentario Endy Croes: A manda carta pa Minister Glenbert Croes cu e peticion pa alarga FASE

Endy Croes

Parlamentario Endy Croes a splica cu den nomber di Fraccion di MEP a manda un carta pa Minister di Asuntonnan Social Sr. Glenbert Croes cu un peticion pa hasi un apelacion na Ministerraad pa alarga FASE cu 3 luna mas. Mescos tabata e caso na December 2020 unda Fraccion di MEP por escrito a hasi un apelacion na e Minister encarga kende na su turno ta busca e sosten den Ministerraad. Esaki no ta diferente. E pandemia no a pasa y no a caba ainda. Aruba ta den recuperacion pero falta hopi ainda. Hopi di nos hendenan ta sin trabou y casi 4000 mama y of tata di famia ta ricibiendo un sosten di FASE. Esaki sigur ta yudanan “machica” durante luna unda nan por cumpli cu nan utilidad y come un poco. Cos no ta nada facil y ta imposibel pa laga e famianan aki na caya mei mei den e pandemia. Mientras gobierno ta preparando un solucion duradero pa e grupo aki Parlamentario Endy Croes den nomber di Fraccion di MEP a manda e peticion official. Muy probablemente e siman aki mes Minister Glenbert Croes lo presenta e carta aki den Ministerraad y nos por ta sigur cu e curason di nos Ministernan ta na e lugar corecto y lo aproba FASE pa esaki por continua.

/// FASE-Loonsubsidie-MKB ta entre otro sosten nan di gobierno:

Durante aña 2020 gobierno a inverti 339 miyon total na ayudonan di emergencia pa henter nos pueblo. Un total di 42.8 miyon a wordo duna na FASE unda 11650 persona a hasi uso di esaki y te cu awe tin alrededor 4000 persona cobrando FASE tur luna. MKB ta e sosten financiero na Middel en Klein bedrijf di Afl. 4000,- pa kwartal. Un total di 2500 compania a cobra esaki inicialmente y te cu fin di aña alrededor di 1800 compania tabata ricibiendo e ayudo aki y awe ainda 1384 compania ta ricibiendo e ayudo aki. Na loonsusbidie unda gobierno ta paga  60% di salaris di empleadonan gobierno a inverti 272 miyon florin di cual te cu fin di aña 21000 persona tabata cobra esaki awe ainda 18 mil hende ta hasiendo uso di esaki. Banda di esakinan nos tin 3000 persona riba bijstand y 30 mil hende ricibiendo un cuminda pa dia entre Rode Kruis y Fundacion pa nos comunidad. Gobierno mester a hasi injeccionnan financiero den AZV y SVB pa garantisa e fondonan. Pues berdad nos ta pasando den temponan dificil pero alavez tin un gobierno cu realmente ta compronde e dolor di comunidad y mesora a sa di brinda e ayudo corecto y directo na e hende. Esaki ta un confirmacion directo cu pa e gobierno aki e ser humano ta central. Parlamentario Endy Croes ta termina bisando cu e ta hopi convensi cu gobierno lo extende FASE cu 3 luna mas te cu final di Juni proximo

Related posts

“Tene A” na MANA

EA News Author

Parlamentario Ricky Hoek: Wega nan interinsular tabata exitoso

EA News Author

Fundacion Telefon pa Hubentud Aruba unbiaha mas ta organisa UNICEF Kinderrechten Filmfestival pa UNICEF Hulanda

EA News Author

Leave a Comment

Whatsapp Message